Chelsea ayaa dalab qaali ah oo dhan 73 milyan ka gudbisay weeraryahanka Sporting Lisbon Viktor Gyokeres laakiin waxa ay u baahan doonaan inay si weyn u kordhiyaan dalabkooda si ay u helaan xiddiga reer Sweden, sida ay sheegayaan wararka ka imaanaya Portugal.
Kooxda ka dhisan galbeedka London ayaa isha ku haysa inay xoojiso weerarkooda suuqa January ka dib markii ay soo bandhigeen qaab ciyaareed liita dhinaca weerarka xilli ciyaareedkan.
Gyokeres ayaa ahaa xiddig diirada u saarnaa kooxda chelsea kadib qaab ciyaareed cajiib ah oo uu ku soo qaatay Sporting.
Xiddiga 25 jirka ah oo Sporting kaga soo biiray Coventry City ayaa dhaliyay 11 gol sidoo kale caawiye ka noqday 8 kale 16 kulan oo uu ciyaaray.
Sida laga soo xigtay wargeyska Portuguese-ka ah ee Record, Chelsea ayaa haatan u gudbisay dalab 73 milyan oo ay ku doonayso xiddiga Gyokeres.
Laakiin Sporting ayaa isla markiiba diiday dalabkaas waxayna u sheegeen dhigooda Chelsea in Gyokeres la iibin doono oo kaliya haddii ay bixiyaan lacagta lagu bur-burin karo heshiiska oo dhan 100 milyan oo euro.