Madaxweyne ku xigeenka Dowlad-Goboleedka Galmudug, Cali Daahir Ciid ayaa soo dhaweeyay dedaallada lagu doonayo in lagu xaliyo xiisadda siyaasadeed ee ka jirta deegaannada Dowlad-Goboleedka Koofur Galbeed ee waxgaradku ay billaabeen.
Cali Daahir Ciid ayaa sheegay in xiisadda siyaasadeed u dhaxaysa Dowladda Federaalka Soomaaliya iyo Maamulka Koofur Galbeed loo baahan yahay in wadahadal lagu xaliyo si looga hortago wax weliba oo kala qaybinta Bulshada abuuri kara.
Waxa uu xusay in aanay awood sheegasho ama qori caaraddii lagu maamuli Karin siyaasadda sidaas awgeed loo baahan yahay in xoogga la saaro wadahadalka si meel loo wada dhigo waxyaabaha dhaliyay khilaafka sida uu hadalka u dhigay.
“Ma jirto xal lagu gaari karo qori caaraddii ama cadaadis siyaasadeed Wadada kaliya ee furan waa in la isku yimaada labada dhinac oo laga wada hadla waxyabaha la isku hayo ee na kala qeybinayo” Ayuu yiri Madaxweyne ku xigeenka DG Galmudug, Cali Daahir Ciid.
Waa uu sii hadlay waxaana uu qoraalkiisa sii raaciyay “Siyaasaddu waa mid is-bed-bedesha, laakiin nolosha qofka binu-aadamka ah waa mid aan dib loo heli karin wa in usan wiil manta nool noga dhiman colaadaas Aan dooranno nabadda si aan u badbaadinno jiilka mustaqbalka”.
Cali Daahir Ciid ayaa 20kii Bishaan waxa uu sheegay in Maamulkiisa uu gogol wadahadal u dhigayo Dowladda Federaalka Soomaaliya & Dowlad-Goboleedka Koofur Galbeed waa haddii ay aqbalaan si ay uga heshiiyaan khilaafka soo kala dhexgalay.