Ra’iisul Wasaaraha Xukuumadda Jamhuuriyadda Federaalka Soomaaliya, Xamsa Cabdi Barre ayaa maanta khudbad ka jeedin doona shir deg deg ah oo ay isugu imanayaan Ururka Jaamacadda Carabta.
Shirka oo ay codsatay dowladda Soomaaliya ayaa waxaa looga hadlayaa xadgudubka gurracan ee dowladda Ethiopia ee ka dhanka ah madaxbannaanida, gobonnimada iyo midnimada Soomaaliya. Sida lagu yiri qoraal ka soo baxay xafiiska Wasiirka koowaad ee Xukuumadda Somalia
Kulan ku qabsoomaya Muuqaalka Fogaan-aragga ayuu maanta Ururka Jaamacadda Carabta ka yeelanayaa xadgudubka ay Itoobiya ku samaysay Madaxbannaanida, Wadajirka & damaceeda gurracan ay ku doonayso in ay ku qaadato qayb kamid ah biyaha Soomaaliya.
Ku xigeenka Xoghayaha guud ee Jaamacadda Carabta Hossam Zaki ayaa sheegay in shirkaan oo dhacaya maanta oo Arbaco ah 17ka Janaayo 2024 looga arrinsanayo khilaafka & xiisadda salkeedu yahay xadgudubka Itoobiya ay ku samaysay Soomaaliya.
Ururka Jaamacadda Carabta ayaa dhowr dhinac ka fiirinaya tallaabooyinka iska soo horjeeda ee Muqdisho iyo Addis Ababa ay wadaan, go’aanka adag Dowladda Federaalka Soomaaliya ay ka qaadatay damaca gurracan ee Itoobiya & hadallada kulkulul ee la is dhaafsaday.
Baarlamaanka Jamhuuriyadda Federaalka Soomaaliya ayaa u codeeyay qaraar lagu burinayo heshiis-ku sheeggii Itoobiya & Maamulka Somaliland ay shaaciyeen 1dii Janaayo 2024 kaas oo meel ka dhac wayn ku ah wadajirka & madaxbannaanida Dhuleed ee Soomaaliya.