Xidhiidhka kubadda cagta Adduunka ee FIFA ayaa baadhitaanno ku samaynaya kooxda horyaalka Premier League ee West Ham, kaddib markii laba heshiis ay ka burbureen maalintii ugu dambaysay suuqa iibka ciyaartoyda bishii January ee xalay saqdii dhexe lasoo gunaanaday.
Lyon ayaa u muuqanaysay inay West Ham kala wareegayso garabka weerarka Algeria ee Sai Benrahma, kaas oo heshiiska saxeexay iyadoo si toos ah looga daawanayo telefishannada.
Si kastaba, heshiiska ayaa burburay waxaana war-saxaafadeed soo saartay Lyon 11 saacadood kaddib markii heshiiska la saxeexay, iyadoo West Ham ku eedaysay ‘ixtiraam-darro ay kula kacday ciyaartoyga iyo iyagaba’, isla markaana uu burburay heshiiska oo ku kacayay £15 milyan oo Gini.
War-saxaafadeedka ayaa lagu yidhi: “Olympique Lyonnais waxay si aad ah uga murugaysan xaaladdan iyo go’aankan oo muujinaya ixtiraam-darro sal u ah West Ham oo ay kula kacday annaga iyo ciyaartoygaba.
“Kooxdu waxay xuquuqdu siinaysaa inay qaaddo dhamaan tallaabooyinka sharci ee lagama maarmaanka ah, si loo dhaqan-geliyo heshiiska, West Ham na loogula xisaabtamo.”
Tababare David Moyes oo maanta la hadlay saxaafadda oo la weydiiyey arrintan, ayaa sheegay in eedaynta Lyon iyo kalmadaha ay isticmaashay ay yihiin kuwo xooggan oo ay bannaanka keeneen ka hor inta aanaan soo bandhigin sidii ay wax u dhaceen.”
Sidoo kale, Real Betis ayaa wali rajaynaysa in ay la saxeexanayso Fornalis oo la ansixinayo inkasta oo sida la sheegay ay cillado computer dib u dhac ku keeneen dhamaystirka hesiiska.
Si kastaba, Lyon iyo Betis ayaa labaduba la xidhiidhay FIFA waxaanay u gudbiyeen arrinta dhacday, taas oo keentay in arrintan lagu sameeyo baadhitaan.