Miraha qoondarka oo afka qalaadna lagu yiraahdo flaxseeds (ama linseeds) waxay ka yimaadaan dhirta flax, oo saynis ahaan loo yaqaanno Linum usiatatissium.
Waxaa jira labo nooc oo mirahan ah: dahabi iyo bunni. Nafaqada ku jirtaa waa isku mid, balse wax yar ayay midab ahaan ku kala duwan yihiin, iyadoo labaduna ay sida looska u dhadhamaan, haddana qoondarka dahabiga ah ayaa yara macaan halka kuwa bunniga ah ay leeyihiin dhadhanka sida in la dubay.
Qoondarka ama flaxseeds caadi ahaan waxaa la helaa iyagoo miro dhan ah, la shiiday amaba bur laga dhigay. Sidoo kale waxaa jirta saliid laga sameeyay.
Qoondarka ayaa ka baxa dalka UK, iyo sidoo kale qeybo dunida ka mid ah, mar walbana waa laga helaa dukaamada. Geedka Flax ayaa soo saara ubax shan fiid leh kaasoo dillaaca xilliga kuleylaha, kaddibna waxay sameeyaan qolof wareegsan oo hoy u noqda miraha qoondarka.
Marka ay qoloftu isu beddesho jaalle, miraha ayaa dibadda usoo baxa, waana u diyaar markaas in la gurto.
Miraha qoondarka kuleyl iyo qabowba waa lagu cuni karaa, iyadoo lagu darsanayo cabitaannada iyo boorashka, maraqa iyo doolshada. Haddii aad isticmaaleyso saliidda qoondarka, waxaad ku darsan kartaa saladhka iyo maraqan.
15g (1 qaaddo) flaxseeds shiidan ah waxaa ku jira:
- 76Kcal/318KJ
- 4g borotiin
- 6g dufan
- 9g carbohydrate
- 3.3g fibre
- 0.2mg vitamin B1
- 0.2mg copper
- 57mg magnesium
- 1.1mg bir
Miraha qoondarka waxaa lagu yaqaannaa inay ku badan tahay fibre-ka iyo maaddada omega-3. Maaddaama mid dhirta ku saleysan uu yahay, omega-3 laga helo flaxseeds wuxuu ku yimaadaa habka ALA (alpha linolenic acid), taasoo laga yaabo inaysan waxtar u lahaan sida omega-3-ga xayawaanka laga helo balse weli cunnada ayaa lagu darsan karaa, gaar ahaan haddii aadan cunin saliidda kalluunka.
Waa maxay faa’iidooyinka caafimaad ee flaxseed?
1. Waxay gacan ka geystaan ka hortagga inay halbowleyaashu xirmaan
Daraasado xayawaan lagu sameeyay ayaa muujinaya in saameynta ka hortagga hurka ee miraha qoondarka ay u muuqdaan inay saameyn faa’iido u leeyihiin kolastraoolka uuna gacan ka geysan karo yareynta inay dufan ku ururto derbiyada halbowleyaasha, taasoo yareyn karta qulqulka dhiigga.
2. Waxay gacan ka geystaan joogteynta cadaadiska dhiigga oo caafimaad leh
Daraasado lagu sameeyay xayawaanka iyo bani’aadamka ayaa muujinaya in miraha qoondarka ay gacan ka geystaan hoos u dhigidda dhiig-karka, iyagoo leg faa’iidooyin ka hortagga hurka jirka.
3. Waxay gacan ka geystaan xakameynta sokorta dhiigga
Miraha qoondarka ama flaxseeds ayaa la ogaaday inay hoos u dhigaan glucose-ta dhiigga.
4. Waxaa laga yaabaa inay ka hortagaan kansarka naasaha
Waxaa jiray daraasado lagu sameeyay bani’aadamka iyo xayawaankaba oo muujinaya in miraha qoondarka ay leeyihiin ka hortagga kansarka naasaha, waxaa tan sabab u ah maaddooyinka ku jira sida omega-3 oo caadiyan ka hortaga hurka jirka.
5. Waxaa laga yaabaa inay gacan ka geystaan kobcinta maskaxda dhallaanka
Daraasad sanadkii 2011 lagu sameeyay xayawaanka ayaa lagu ogaaday in cunnada ay hooyadu cunto ee ay ku jirto flaxseed ay gacan ka geysatay koboca caafimaadka leh ee maskaxda dhallaanka.
Baaritaan dheeri ah ayaa loo baahan yahay si loo go’aansado inay faa’iido u leedahay bani’aadamka, balse waxaan ognahay in cunidda omega-3 ay sare u qaaddo waxbarashada, xusuusta iyo qulqulka dhiigga ee maskaxda.
6. Waxay gacan ka geysan karaan ka hortagga calaamadaha caado go’a
Flaxseeds waxaa ku jira maaddooyinka phytoestrogens, oo la mid ah kuwa oestrogen ee aadmiga laga helo. Maaddooyinkan phytoestrogens ayuu jirku u beddelaa kuwo faa’iido u yeelan kara inay ka hortagaan calaamadaha caado go’a.
7. Waxay maqaarka ka dhigaan mid caafimaad leh
Daraasad sanadkii 2010 la sameeyay ayaa lagu ogaaday in haweenka isticmaala saliidda flaxseed ay isku arkeen isbeddel dhanka jirka ah iyadoo qalleylka maqaarka uu ka ba’ay uuna qoyaan yeeshay
8. Waxay gacan ka geysan karaan hoos u dhigidda miisaanka
Miraha qoondarka waxaa ku badan maaddada fibre, inaad cuntana waxay hoos u dhigeysaa abitaytka maaddaama aad dareemi doonto inay calooshu ku buuxdo oo aad dheregsan tahay, taasna waxay keeneysaa hoos u dhac miisaanka ah.
Waa maxay sida ugu caafimaadka badan ee loo cuni karo flaxseed?
Miraha qoondarka oo la shiiday ayaa ah kuwa faa’iidada ugu badan laga heli karo, intii la cuni lahaa iyagoo dhan dhan, maaddaama maaddada omega-3 ee ku jirta laga heli karo jirka marka la cuno.
Miraha qoondarka oo dhan dhan caadi ahaan waxay sii ahaanayaan kuwo aan shiidneyn.
Saliidda miraha qoondarka ayaa waxaa ku jira xaddi sare oo omega-3 ah marka loo eego kuwa la shiiday, balse miraha la shiiday waxaa iyagana ku jira faybar badan.
Ku darso 1-2 tbsp boorashkaaga subixii
Ku darso 1-2 tbsp cabitaanka
Ku darso 1-2 tbsp maraqa digaagga ama kalluunka
Ku darso 1-2 tbsp si aad ugu adkeyso
Miraha qoondarku ma u fiican yihiin qof walba?
Waa suurtogal inaad xasaasiyad ku qabi karto miraha qoondarka. Haddii ay jirto calaamad walba oo falcelin xasaasiyad muujineysa sida neefta oo kugu adkaata, barar wejiga ah, carrabka amaba faruuryaha, kaddib degdeg dhaqtar ugu tag maaddaama tan ay khatra ku tahya naftaada.
Dadka isticmaala dawooyinka xiidmaha dhiigga yareeya amaba qaata dawada dhiig-karka ayaa lagula talinayaa inay dhaqtarkooda la tashadaan kahor inta aysan cunnadooda ku darsan flaxseeds.
Miraha qoondarka ayaa gacan ka geysan kara hoos u dhigidda sokorta dhiigga waxaana dadka lagula talinayaa haddii ay dawo u qaataan sokorowga, inay la tashadaan dhaqtarkooda.
Waxaa kaloo jira walaac ah in mirahan qoondarka ay sun noqon karaan maaddaama ay ku jirto maaddada cyanide. Si kastaba, waa haddii aad maalintii cunto wax ka badan hal kiilo oo flaxseeds ah marka walaacan uu imaanayo, balse qaadashada 1-2 tbsp maalintii (qiyaastii 15-30g) waxba ma dhibeyso.