Madaxweynaha Soomaaliya Xasan Sheekh Maxamuud ayaa maanta si diirran loogu soo dhaweeyey Qasriga Al-Itixaadiyah ee looga arrimiyo dalka aan walaalaha nahay ee Masar.
Madaxweyne Xasan iyo Madaxweynaha dalkaasi Cabdulfataax Al-Siisi ayaa halkaasi ku yeeshay kulan xasaasi ah oo looga hadlay xiriirka labada dal, xiisadda badda ee taagan iyo iskaashiga cusub ee labada dhinac.
Kulankaan ay maanta Xasan iyo Al-Siisi ku yeesheen Qasriga Madaxtooyadda magaalada Qaahira ayaa ahaa mid mira-dhal ah oo madaxda wax badan iskula meel dhigeen, sida ay baahisay warbaahinta dowladda.
Dowladda Masar ayaa dhawaan si buuxda uga soo horjeesatay damaca Itoobiya ee badda Soomaaliya, iyada oo taageertay madax-bannaanida iyo midnimada dhuleed ee Soomaaliya.
Sidoo kale Masar ayaa si weyn u cambaareysay heshiiskii muranka dhaliyay ee ra’iisul wasaaraha Itoobiya la saxiixday Madaxweynaha Somaliland, kaasi oo 1-dii bishaan ka dhacay Addis Ababa.
Heshiis beenaadkaas ayaa xad-gudub ku ah madax-bannaanida Soomaaliya, waxaana si weyn uga gil-gishay dadka Soomaaliyeed meel kasta oo ay joogaan
Soomaaliya ayaa xilligaan si gaar ah usoo dhaweysaneysa Masar oo ayadu cadeysay inay si buuxda u garab taagan tahay Soomaaliya, waxaana cadowga koowaad u ah Itoobiya.
