Eloy Room waa goolhayaha kaliya ee uu xiddiga reer Argentina ee Lionel Messi weydiistay garankiisa kaddib markii ay dhamaatay ciyaar saaxiibtinimo oo uu xulka qaranka Argentina 7-0 ku xasuuqday Curacao bishii March ee sannadkii hore.
Goolhayaha kooxda Vitesse ayaa badbaadiyey kubbado badan oo xulka Argentina uu goolasha kusii dheeraysan lahaa, waxaana uu qaybtii hore sameeyey bandhig heersare ah isagoo Lionel Messi ka joojiyey darbado xooggan iyo kubbado xeeladaysan oo uu masaafo dhow kaga ganay.
Markii ay ciyaartu dhamaatay ayuu Lionel Messi oo garankiisa ay isku haysteen ciyaartoyda Curacao ka dalbaday Eloy Room oo 34 jir inuu siiyo gara kiisa, waxaanay taasi layaab ku noqotay goolhayahan oo isaguna si degdeg ah ugu siibay.
Eloy Room oo ka sheekaynaya dhacdadan ayaa yidhi: “Qof walba waxa uu doonayay shaadhka Messi. Sidaa daraadeed wax rajo ah kama qabin in aan anigu helayogarankiisa. Cuco Martina oo ah kabtankayaga ayaa ka hor ciyaarta igu yidhi: ‘waxa aan doonayaa garanka Messi!’… Markaa anigu waxaan haystay dookh ah inaan garanka ka beddesho goolhaye Emiliano Martinez. Waa goolhaye heer caalami ah, waanan ku qasbanaa inaan iska illoobo Messi.
“Qaybtii hore waxa aan kubbado badan ka badbaadiyey Messi, markii aanu kusii soconay qolka labbiska waqtiga nasashada ayaan arkay Messi oo agtayda socda, waanan ka faa’iidaystay fursadda anigoo ku idhi: ‘Ma isiin kartaa garankaaga marka ay ciyaartu dhamaato?’. Wuxuu iigu jawaabay, ‘Haa, waa caadi. Waan samayn doonaa marka ay ciyaartu dhamaato.’ Wali waxa aan rumaysnaa in aanay dhacaynin sababtoo ah qof walba ayaa doonayay inuu weydiistay, aniguna waxba kama filaynin.
“Qaybtii labaad ayaan sidii hore oo kale kubbado badan oo laadad toos ahaa uga badbaadiyey Messi. Markii ay ciyaartu dhamaatayayaan arkay isaga oo jooga hortayda xerada ganaaxa dhaxdeeda, waxaanan ku idhi: ‘Hey, ma isiin kartaa garankaaga?’ wuxuu igu yidhi: “Haa, waa sax.’ Wuu sii jeedsaday oo garankiisa ayuu iisoo saaray. Waxa aan is-weydiiyey ‘Sidee ayey ku dhacday in Messi garankiisa ku siiyo.’
“Kaddib wuu iisoo jeedsaday oo wuxuu igu yidhi: ‘si fiican ayaad u ciyaartay, waxa aad tahay goolhaye fiican.’ Markii uu iga sii tegayay, ayuu Messi igu yidhi: ‘Laakiin adiguna garankaaga ma isiin kartaa?’ Waxa aan isweydiiyey: ‘Muxuu Messi ku falayaa garankaaga? Waan siiyey, waanan gacan qaaday.”
Eloy Room oo hadalkiisa sii wata ayaa ku daray: “Ma aanan fahamsanahay waxa uu ku falayo garankayga, laakiin mar dambe ayaan fahmay markii uu ciyaartoyga reer Argentian ee aanu u wada ciyaari jirnay Columbus Crew ii sheegay in Messi uu urursado garamada qiimaha u leh isaga. Waxa uu gurigiisa ku haystaa garamo badan. Waxa laga yaabaa in uu garankaygu ku jiro, sababtoo ah waxa aan ahaa goolhayaha uu ka dhaliyey goolkiisii 100aad ee uu u dhaliyo xulka qarankiisa Argentina. Waxa laga yaabaa in garankaygu uu ku jiro kuwa uu kaydsaday.”