Jamie Carragher Oo Magacaabay Tababaraha Uu Doonayo In Loo Dhiibo Liverpool

Halyeyga Liveprool ee Jamie Carragher ayaa ka hadlay go’aanka tababare Jurgen Klopp uu kaga tegayo kooxdiisa Liverpool, waxaana uu tilmaamay macallinka uu la doonayo in uu noqdo beddelkiisa ee ay tahay in maamulka Liverpool ay magacaabaan.

Jurgen Klopp ayaa soo afjaraya sagaal sannadood oo uu joogay Anfield, waxaana layaab ku noqotay taageereyaasha markii uu Jimcihii muuqaal uu soo duubay ku sheegay inuu go’aansaday inuu ka tago kooxda marka uu xilli-ciyaareedkani dhamaado, isaga oo ku sababeeyey inay dhamaatay tamartii uu shaqada kusii wadi lahaa

56 jirkan oo Liverpool u qaaday Champions League, Premier League, FA Cup, Carabao Cup iyo Club World Cup ayaa tababaraha Liverpool noqday sannadkii 2015, isaga oo waqtigaas beddelay Brendan Rodgers.

Tiro tababareyaal waaweyn ah ayaa lala xidhiidhinayaa Liverpool, waxaana ka mid ah Roberto De Zerbi, Zinedine Zidane iyo Xabi Alonso oo isagu ah shaqsiga ugu cadcad maadaama ay kooxdiisa Bayer Leverkusen wacdaro ka dhigayso horyaalka Bundesliga, sidoo kalena uu hore ugu soo ciyaaray Liverpool oo uu ka mid ahaa xiddigihii sannadkii 2005 u qaaday Champions League.

Halyeygii Liverpool iyo xulka England difaaca uga ciyaari jiray ee Jamie Carragher ayaa waxa uu sheegay in labada tababare ee kusoo baxaya Liverpool ay yihiin Xabi Alonso iyo Roberto De Zerbi oo uu sheegay inay shaqooyin cajiib ah ka hayaan kubadda cagta, balse waxa uu hu’ga saartay Alonso.

“Waxa aad ka firkirtaan tababareyaasha uu lasoo shaqeeyey Xabi Alonso, waa Rafa Benitez oo Liverpool ay wada joogeen, Jose Mourinho, Carlo Ancelotti iyo kuwo kale. Hadda waxa uu shaqo cajiib ah ka qabanayaa Bayer Leverkusen, waa tababaraha ugu da’da yar ee shaqada ugu fiican ka haya kubadda cagta, shakina kuma jiro.” Ayuu yidhi Jamie Carragher.

Waxa uu intaa ku daray: “Mid kale waa Roberto De Zerbi ee Brighton jooga oo shaqo fiican qabanaya. shaqadiisu waa mid u dhow heerka Jurgen Klopp.

“Laakiin waxa aad eegtaan waxa uu Xabi Alonso ka qabanayo Bayer Leverkusen, waxay la tartamayaan Bayern Munich. Bal eeg waxa uu De Zerbi qabanayo, waxa uu isku dayayaa inuu la tartamo kooxaha sare ee horyaalka Premier League, xilli-ciyaareedkii horena shaqo aan caadi ahayn ayuu qabtay.”

Intaa kaddib ayuu Jamie Carragher sii kala doortay Xabi iyo De Zerbi, waxaanu yidhi: “Anigu waxa aan dooran lahaa Xabi Alonso.”