Magaalada Garoowe ee caasimadda dowlad gobaleedka Puntland waxaa saaka laga dareemayaa qabanqaabadii ugu dambeysay ee xafladda caleema saarka madaxweynaha dhawaan dib loo doortay ee Puntland Siciid Cabdullaahi Deni.
Ammaanka magaalada ayaa aad loo adkeyay waxaana hoteellada iyo meheradaha laga cunteeyo buux dhaafiyay dadka ka qayb galaya caleeema saarka oo siyaasiin u badan, iyada oo waddooyinka qaar ee caasimadda lagu arkayey ciidamo gaaf wareegaya kuwaas oo sugaya amniga magaalada oo marti badan ay ku sugan tahay.
Munaasabadda caleemasaarka ayaa la filayaa in ay dhacdo galinka dambe ee maanta, waxaana subaxnimadaan hore ee maanta la filayaa in ay shir ku yeeshaan madaxda dowladda gobaleedyada dalka iyo kuwa federaalka oo aan weli gaarin.
Shalay Garoowe waxaa gaaray Madaxweynayaasha maamul gobaleedyada Galmudug iyo Koonfur Galbeed, si la mid ah Madaxweynaha Hirshabeelle ayaa maalin ka hors i diiran loogu soo dhaweeyey caasimadda, waxaana weli gaarin Madaxweynaha Jabbaland Axmed Madoowe oo madmadow uu ku jiraa ka qeyb galkiisa.
Caleema saarka Deni ayaa ka duwan kuwii hore waxaana ka baaqsaday Madaxweynihii hore ee Soomaaliya Maxamed Cabdullaahi Farmaajo, waxaana la filayaa maanta in uu gaaro Madaxweyanah Soomaaliya Xasan Sheekh Maxamuud oo uu wanaagsaneen xiriirka kala dhaxeeya Deni.