Faahfaahin dheeraad ah ayaa laga helayaa sida ay u dhacday toogashada

Gaalkacyo: Hodan M. Diiriye Waxaa Lagu Fuliyay Xukun Qisaas, iyadoo la Ilaalinayo Dareenka Ubaddkii ay Ka Tagtay

Faahfaahin dheeraad ah ayaa laga helayaa sida ay u dhacday toogashada lagu fuliyay Alle ha u naxariistee Marxuumad Hodan M. Diiriye, oo horay Maxkamaddu ugu xukuntay dil-toogasho, kaddib markii lagu helay fal dil ah.

Sida ay ii xaqiijiyeen xubno goob-joog ahaa saakay, fulinta xukunka dilka ah waxaa sameeyay mid kamid ah wiilasha la dhashay Marxuumad Sabiriin Seylaan Cabdulle, kaas oo sharci ahaan u lahaa xaqa fulinta qisaasta.

Daqiiqado ka hor inta aan fulin xukunka, waxaa la xaqiijiyay in Marxuumad Hodan oo wajiga loo furay iyo ehelka dhibbanaha uu dhexmaray wada-hadal kooban, oo marxuumaddu ay ku dalbatay cafis balse ugu dambeyn la fuliyay go’aanka maxkamadda.

Dhanka kale goob-joogayaasha ayaa sheegay in aan la duubin wax muuqaallo ama sawirro ah oo muujinaya fulinta toogashada, taas oo ay sheegeen in looga gol lahaa ilaalinta dareenka carruurta aan dambiga lahayn ee marxuumadda la toogtay, maadaama ay ka dhalan kartay argagaxa saameeya caruurta.—