Ciidamada badda Hindiya ayaa soo badbaadiyay labo markab oo lagu afduubtay xeebaha Soomaaliya, iyadoo cabsi iyo walaac laga qabo inay dib u soo cusboonaato burcad badeedda xeebaha Soomaaliya.
Howlgalkaan badbaadinta ah ee uu sameeyay markabka dagaalka ee INS Sumitra ayaa qaatay muddo 36 saacadood gudahood ah.
Maalmo ka hor, ciidamada difaaca ee Seychelles ayaa sheegay in ay burcad badeed ka soo furteen koox kalluumeysato ah.
Biyaha iyo xeebaha Soomaaliya ayaa horay u ahaa meel ay ku badan yihiin burcad-badeedda, balse waxaa ay dhammaan joogsadeen, kaddib markii ciidamada caalamiga ah ay kordhiyeen roondada ay halkaasi ka sameeyna.
Hindiya ayaa horey gacan uga gaysatay ilaalinta aagga biyaha Soomaaliya tan iyo 2008-dii.
Qaar badan oo ka mid ah ciidamada caalamiga ah ee qeybta ka ah howgallka ilaalinta biyaha Soomaaliya ayaa hadda u guuray dhanka Badda Cas, sida ay ku warrantay wakaaladda wararka ee AFP, halkaasoo kooxda Xuutiyiinta ee Yamen ay weerarro ku qaadaan maraakiibta gancsiga ee maray.
Khubarrada ayaa hadda ka cabsi qaba in arrintaas ay ka faa’iideysteen burcad badeedda Soomaaliyeed, sida ay sheegtay AFP.
Afduubkii ugu horreeyay ee burcad badeedda ay fuliyaan tan iyo 2017 kadib ayaa dhacay bishii December ee la soo dhaafay, iyadoo Michael Howlett, oo ah agaasimaha Xafiiska Caalamiga ah ee Badaha, uu xusay in ay arrintan tahay mid “walaac abuuri karta”.
Intaasi wixii ka dambeeyay waxaa jiray warbixinno isdaba joog ah oo ku saabsan falal afduub ah oo ka dhacay biyaha Soomaaliya.
Sida laga soo xigtay ciidamada badda Hindiya, markabkoodu wuxuu ka jawaabay codsi u yimid 28-kii Janaayo, dooni sidatay calanka Iiraan.
Saraakiisha ciidamada badda ayaa tilmaamay in budhcad-badeedda ay ku qasbeen in ay sii daayaan shaqaalihii la socday doonida “sida lagu sheegay qoraal la soo dhigay barta X ee horey loo dhihi jiray Twitter.
“Markii 17-kii shaqaalaha ahaa la sii daayay, markabka ayaa la nadiifiyay oo loo ogolaaday inuu safarkiisa sii wato, ayaa lagu yiri qoraalka ciidanka badda Hiniya,”war saxaafadeedka laguma xusin xaaladda burcadbadeedda iyo halka ay ku danbeeyna.
Ciidanka badda Hindiya ayaa sheegay in maanta oo Talaadado ah markabka dagaalka ee INS Sumitra mar kale “laga dalbaday in kaalin uu ka qaato soo badbaadinta Markabka kalluumeysiga ee Al-Naimi oo sitay calanka Iiraan iyo shaqaalihii saarnaa.”
Askarta ayaa sidoo kale soo badbaadiyay shaqaale ka kooban 19 badmaaxiyiin ah oo u dhashay dalka Pakistani kuwaas oo Markabka la socaday.
Ciidamada badda Hindiya ma sheegin halka ay ku dambeeyaan raggii bucad badeedda ahaa ee Markabka haysatay, balse sawir la soo geliyay barta X ee ciidanka badda Hindiya ayaa muujinayay ciidamo hubeysan oo ilaalinaya rag gaaraya ilaa 10 nin oo gacmaha ka xiran.
Horraantii bishii Janaayo, ciidamada kumaandooska Hindiya ayaa soo badbaadiyay 21 shaqaale ah oo saarnaa markab sitay calanka Liberia oo ay burcad badeeddu ku weerareen xeebaha Soomaaliya.
Dhanka kale, Jaziirada Seychelles ayaa sheegtay in ciidamadeedu ay soo furteen Sabtidii lix kaluumaysato ah oo u dhashay dalka Sri Lanka, kaddib markii ay muddo saddex maalmood ah haysteen rag hubeysan oo ku weeraray meel 840 nautical miles (1,555 KM) Koonfur-bari kaga beegan caasimadda Soomaaliya ee Muqdisho.
Ciidanka Badda Hindiya ayaa fuliyay dhowr howlgal oo ka dhan ah burcad badeedda Soomaalida.