Guddoomiyaha Hay’adda Maaraynta Musiibooyinka Qaranka Maxamuud Macallin iyo ku-xigeenka Ergayga gaarka ee xoghayaha guud ee Qaramada Midoobay ahna xiriiriyaha gargaarka biniadinnimo ee Soomaaliya George Conway ayaa maanta si wada jir ah u daah-furay Qorshaha ka jawaabista baahiyaha bini’adannimo ee 2024.
Guddoomiyaha SoDMA oo qudbad ka jeediyay shirka ayaa sheegay in sanadkii tagay dadka Soomaaliyeed ay isugu darsameen fataahado ka dhashay roobabkii Elnino-da kuwaas oo sababay barakac fara badan isagoo sheegay in 80% dadka ku barakacay ay yihiin Caruur iyo Haween.
Guddoomiye Maxamuud ayaa sheegay in Dowladda Soomaaliya ay ka walaacsantahy xaaladda bini’aadannimo ee ka sii darayso taas oo ay sababtay xaaladda isbeddelka Cimilada, iyadoo dowladda Soomaliyana ay ka go’antahay wax ka qabashada xaladdaas adag.
“Hay’adaha dowliga iyo kuwa aan dowliga ahayn ee ka shaqeeya arrimaha samafalka ayaa dalbanaya lacag dhan 1.6 bilyan si loo caawiyo dad gaaraya 5.2 Milyan oo Soomaali ah sanadka 2024,” sida lagu yiri qoraal ka soo baxay Hay’adda SODMA.
Ku-xigeenka Ergayga gaarka ah ee Qaramada George Conway ayaa isagana ka sheegay shirka in dhinacyada ka shaqeeya samafalka ay xoojin doonaan yoolka gaarista hawlaha socda waxayna ka shaqayn doonaan natiijooyin wada jir ah oo gacan ka gaysan doono dhimista baahiyaha iyo khatarta.
Ugu danbayn shirkaan waxaa ka soo qayb-galay wasaaradaha gargaarka dowlad goboleedyada dalka, Hay’adaha ka shaqeeya samafalka, Deeq-bixiyayaasha iyo madax ka socotay hay’adda QM ee ka shaqeeya samafalka.