Madaxweynihii hore ee Dowladdii Kumeel-gaarka ah ee Jamhuuriyadda Jabuuti lagu soo dhisay Cabdiqaasim Salaad Xasan oo ka hadlay heshiis-beenaadkii dhowaan ay kala saxiixdeen Muuse Biixi & Abiy Ahmed ayaa sheegay in uu ahaa mid sharci-darro ah oo aan socon doonin.
Cabdiqaasim ayaa sheegay in Somaliland ay kamid tahay Gobollada Jamhuuriyadda Soomaaliya sidaas awgeed aanay geli Karin heshiis xaddigaas la eg, waxaana uu ku tilmaamay in aanay garab-istaag muuqda heli doonnin.
Dalalka ka falceliyay ee diidmada kala hor tagay ayuu u mahadceliyay isaga oo sheegay in taasi ay muujinayso ixtiraamka ay u hayaan Madaxbannaanida & wadajirka Ummadda Soomaaliyeed sida uu sheegay Cabdiqaasim Salaad Xasan.
“Somaliland waa Gobol kamid ah Jamhuuriyadda Soomaaliya mana gali karto heshiis, sidaad daraateed wax ka jira ma jiraan oo cid aqoosanaysa ma jirto, Dowlado badan ayaa ka hadlay oo ma jirayso cid aqoonsanaysa ama fahmaysa, Madaxweyne Siisi & Dowladda Masar ee aan walaalaha nahay waxa aan ugu mahadcelinaynaa sida ay uga hor yimaadeen dhibaatada Itoobiya ay u gaysanayso Soomaaliya iyo waxa ay ku dhawaaqday” Ayuu yiri Cabdiqaasim Salaad Xasan Madaxweynihii hore ee Soomaaliya.
Itoobiya ayaa cambaarayn & cadaadis isdaba-joog ah kala kulantay tallaabadii ay ku shaacisay 1dii Janaayo 2024 in ay heshiis la gashay Maamulka Somaliland gaar ahaan Muuse Biixi Cabdi kaas oo ay ku damacsanayd in ay ku qaadato qayb kamid ah Dhulka Soomaaliya.