Tababaraha kooxda kubadda cagta Liverpool ee Jurgen Klopp ayaa shaaciyey, in uu kooxdiisa ka dhaawacmay weeraryahanka reer Uruguay ee Darwin Nunez, isla markaana aanu hubin inuu taam u noqon doono kulanka Axadda ee Arsenal.
Nunez oo Afjar jeer birta garaacay kulankii Chelsea ee Salaasadii, isla markaana loo diiwaangeliyey rikoodhka nasiib-laawaha, ayaa waxa uu rajaynayay inuu diyaar u noqon doono ciyaarta Arsenal ee Emirates Stadium oo uu kusoo laaban doono dhalinta goolasha.
Laacibkan ayaa garoonka Anfield ka baxay Salaasadii isaga oo dhaawac ah oo xidhan kabta lugta ilaaisa, waxaana sawirro laga qaaday ay muujiyeen in aanay wax jabniin ah jirin faraha lugtiisa laakiin uu xanuun badan dareemayo.
Tababare Jurgen Klopp oo maanta la hadlay saxaafadda ayaa xaqiijiyey dhaawaca Nunez, waxaanu yidhi: “Anigu ma hubo in Darwin uu taam noqon doono iyo in kale, in uu ciyaari doono iyo in kale.
“20 daqiiqadood markii ay ka hadhsanayd dhamaadka ciyaartii Chelsea ayaa lugta lagaga istaagay, waxaanu dareemay xanuun badan. 20 daqiiqadood markii ay ka hadhsanayd dhamaadka ciyaarta ayuu dareemay xanuun.
“Waxa uu garoonka ka baxay isaga oo xidhan kab ilaalisa lugta, laakiin sawirrada ayaa muujiyey in aanu jabnayn, sidaa daraadeedn waynu eegi doonaa haddii uu di usoo laaban karo, balse saaka kuma arag garoonka tababarka, waananu sugi doonaa.”
Haddii Darwin Nunez uu dhaawac ku maqanaado kulankan, waxa Liverpool ay waayi doontaa garab weerar maadaama wali aanay dhakhaatiirta kooxdu caddaynin in Mohamed Salah uu diyaar u noqonayo kulanka Arsenal iyo in kale, inkasta oo Salaasadii la arkay isaga oo tababarka kuq aadanaya garoonka Kirkby.