Hay’adda Sirdoonka iyo Nabadsugidda Qaranka ee NISA oo soo saartay warsaxaafadeed ayaa ku sheegtay in ay ku guuleysatay in ay dalka dibaddiisa ka xirtay 14 barro internet ah (Website) oo ay lahaayeen Al-Shabaab kuwaas oo ay ku faafin jireen wararkooda.
“Hawlgalkan oo isugu jiray uruurinta mareegaha, baaritaankooda, helista magacyada milkiileyaasha ku diiwaangashan iyo ugu dambeyn xiritaankooda ayaa socday bilihii la soo dhaafay, waxaana lagu guuleystay in hawada laga saaro barahan oo la diiwaan-geliyay sanado kala duwan,” sida lagu yiri warka ka soo baxay NISA.
Website-yadan ayaa booqashadooda laga mamnuucay adduunka oo dhan, waana markii ugu horaysay oo la qaado tallaabo nuucaan oo kale ah iyada oo barahan ay soo jireen muddo dheer sida ku cad magacyadooda iyo taariikhaha la aas-aasay,” ayaa lagu sii yiri warsaxaafadeedka.
Sidoo kale warka ka soo baxay NISA ayaa lagu sii diray, “Intii ay socotay hawshan lagu ciribtirayo website-yada Khawaarijta ayaa waxaa la helay liiska dadkii diiwaan-geliyay iyaga oo isticmaalaya kaararka wax lagu iibsado, waxaana lala wadaagay hay’adaha amniga ee dalalka ay ku nool yihiin.
Dowladda Soomaaliya ayaa horay ugu guuleysatay in booqashada Mareegahan laga mamnuuco gudaha wadanka, waxaana sharciga lala tiigsan doonaa cid kasta oo lagu helo in ay kooxahan u diiwaangelisay website.”
