Al shabaab ayaa baahisay in ay geeriyoodeen labo dhakhaatiir ah oo muddo sanado ah ay gacanta ku hayeen.
Dhakhaatiirta oo u dhalatay dalka Cuba ayaa in kabadan afar sano kahor laga afduubtay gudaha dalka Kenya iyadoo markii danbe Al-shabaab ay sheegeen in ay gacanta ku hayaan.
War ay soo saareen ayey ku sheegeen in duqeyn ka dhacday degmada Jilib ay ku geeriyoodeen labadan dhakhaatiirta ah, inkasta oo aysan jirin ka madaxbanaan kooxda oo xaqiijin kara sida ay wax u dhaceen.
Warsaxaafadeed kasoo baxay Al Shabaab ayaa lagu sheegay in duqeyn ay diyaaradaha Mareykanka ka geysteen degmada Jilib lagu dilay labadan dhakhaatiirta ah ee udhashay dalka Cuba.
Al shabaab ayaa ku warrantay in habeenkii Khamiista ee lasoo dhaafay ay Maraykanku duqayn ku dileen kadib markii ay gantaallo ku dhufteen gurigii ay ku jireen oo ku yaalla degmada Jilib.
Sawirrada meydadka dhakhaatiirta ayaa lagu baahiyay baraha bulshada ee ay kooxdu isticmaasho.
Dhanka kale, Wasaaradda Gaashaandhigga Soomaaliya ayaa Sabtidii sheegtay in 15 ka tirsan Al-Shabaab lagu dilay howlgallada dhanka cirka ah ee ay ka fuliyeen gobollada Shabeellaha Hoose iyo Galguduud.
“Diyaaradahan oo ay taageerayaan saaxiibo caalami ah ayaa lagu bartilmaameedsaday kooxda oo ku sugnaa Kuntu Waarey oo ka tirsan Shabeellaha Hoose iyo Galcad oo ka tirsan Galguduud” ayaa lagu yiri warka.
“Duqeymahan ayaa lagu bartilmaameedsaday goobo ay ku sugnaayeen Al-Shabaab iyo hantida argagixisada” ayaa la sii raaciyaya hadalka wasaaradda.
Xilliga uu dhacayay afduubka raggaan ayaa oo ahayd shan ka hor, lama aqoonsaneyn in Al shabaab ay ka danbeeyeen, iyadoo sidoo kale askari lagu dilay halka uu afduubku ka dhacay.
Dhakhaatiirka ayaa afduubka kadib la xaqiijiyay in lala galay dhinaca Soomaaliya.
Senator Cali Roba, oo xilligaasi ahaa guddoomiyaha ismaamulka Mandheera, ayaa hadal uu soo saaray ku sheegay “in gaariga kooxda afduubka geystay ay is hortaageen gaarigii ay wateen dhakhaatiirta “oo ay rasaas ku fureen ilaaladooda, mid kamida ilaaladana uu halkaa ku geeriyooday”.
Labada dhakhtar ayaa lagu kala magacaabayay Dr Assel Herera Correa oo ah dhakhtar guud iyo Dr Landy Rodriguez oo ah dhakhtar ka howl geli jiray dhinaca qalliinnada.
Afduubka kahor ayaa deganaayeen isbitaalka guud ee ismaamulka Mandheera iyagoo qeyb ka ahaa koox ka kooban 100 Cuban ah oo Kenya yimid sanadkii 2018-kii si ay gacan uga geystaan kor u qaadista adeegyada caafimaadka.
Sanadkii 2020-kii ayaa waxaa soo baxay warar sheegaya in ragga gacanta ugu jira Al-shabaab lasii daayay iyadoo la sheegay in warkaasi uu kasoo baxay sarkaal katirsan dowladda Soomaaliya, hase yeeshee wasiirkii arrimaha dibadda ee xilligaas Dr Axmed Ciise Cawad oo la hadlay BBC-da ayaa beeniyay.
“Dowladda Soomaaliya waxa ay waddaa dadaal, waxaana nagala shaqeyneysa dowladda Cuba, balse hadda ma aha war xaqiiq ah in lasii daayay dhakhaatiirtii ay Al-shabaab afduubteen, dowladda Cubana wey nalasoo xiriiraan waxana kawada hadalnaa halka ay wax maraan”, ayuu yiri wasiir Cawad.
Wasaaradda arrimaha dibadda ee Cuba ayaa Sabtidii sheegtay in aan la xaqiijin karin dhimashada la sheegay in lagu dilay labada dhakhtar ee Cuba u dhashay ee Assel Herrera Correa iyo Landy Rodríguez Hernandez.
Magaalada Mandheera ayaa inta badan waxaa xilligaasi ka dhacayay weerarro ay ku dhinteen dad badan oo isugu jira rayid iyo ciidamo ka tirsan kuwa ammaanka. Inta badan Al-Shabaab ayaa sheegata mas’uuliyadda.
Bishii Nofembar sanadkii 2018-kii, weeraryahanno hubaysan ayaa dhaawacay shan qof oo ay ku jiraan laba carruur ah waxayna afduubteen samafale Talyaani ah oo ku sugneyd Chakama, oo ah magaalo yar oo u dhow xeebta Kenya iyo koonfurta xadka Soomaaliya. Haweeneydaas ayey markii dambe kooxdu sii daayeen iyadoo dib ugu noqotay Talyaaniga.
Kooxdan ayaa weerarro dhowr ah ka geystay gudaha Kenya, gaar ahaan gobolka ku yaalla xadka Soomaaliya, si ay cadaadis ugu saaraan dowladda Kenya in ay ciidamadeeda kala baxdo Soomaaliya.