Guddoomiyihii hore ee Golaha Shacabka Baarlamaanka Soomaaliya Maxamed Sheekh Cismaan Jawaari ayaa sheegay in Xafiiska Xeer Ilaalinta looga baahan yahay in uu waaran u jaro Muuse Biixi Cabdi maadaama uu sameeyay Khiyaano Qaran.
Jawaari ayaa tilmaamay in arrinta uu ku dhaqaaqay Muuse Biixi aanay u baahnayn marqaati isagana uu afkiisa ka qirayo sidaas awgeed loo baahan yahay in loo jaro warqad si meel weliba oo lagu qaban gacanta loogu dhigo.
Garsoorka ayuu sheegay in uusan weli qaadin wax tallaab ah oo la falgalaysa heshiis-beenaadkii Muuse Biixi Cabdi uu shaaciyay in uu Itoobiya la galay si ay u hesho 20 Kiilo-mitir oo kamid ah Badda Soomaaliya.
Maxamed Sheekh Cismaan Jawaari ayaa bogaadiyay Baarlamaanka & Xukuumadda oo sheegay in ay guteen waajibka qaran ee saaran isla markaana ay qaadeen tallaabooyin ay uga dhiidhinayaan xadgudubka Itoobiya & heshiis ku sheegga.
“Xeerka Ciqaabta Soomaaliyeed waxa uu qorayaa Qof alla qofkii Gobonnimada Soomaaliyeed Qayb kamid ah ama kuligeed hoos geeya Dowlad kale oo ajnabi ah Khiyaano Qaran ayaa la dhahaa oo xukunkeedu dil yahay, Muuse Biixi waxa uu sameeyay waa bareer oo maba qarsoonno oo isaga ayaa ku faanaya, asiga oo maqan xitaa waala xukumi karaa oo markii la arko ayaa lasoo qaban karaa, Shacabka Somaliland raalli kama ahan arrintaas” Maxamed Sheekh Cismaan Jawaari.
Itoobiya ayaa xadgudubkaan ay ku samaysay Madaxbannaanida & midnimada Dhuleed ee Jamhuuriyadda Federaalka Soomaaliya waxaa ka dhiidhiyay dhinacyo badan oo isugu jira Soomaali & Ajaanib iyaga oo u digay Xukuumadda Abiy Ahmed.