Ciidamada milatariga dalka Ukraine ayaa war ay soo saareen ku shaaciyay in ay bur buriyeen oo quusiyeen markab nuuca dagaalka ah oo ay leeyihiin ciidamada Ruushka, xilli markabkaasi uu ku sugnaa badda madow.
Wasaaradda difaaca Ukraine ayaa sheegtay in markabka Ivanovets oo siday gantaallo uu ku quusay xeebta Crimea ka dib markii ay si toos ah u garaacen dhowr doonyood oo ah kuwa aan wadaha laheyn .
Dowladda Ruushka ayaan ka hadlin warkan kasoo baxay Ukarine ee sheegaya in ay quusiyeen markab nuuca dagaalka ah, waxaana la sii daayay muuqaalo muujinayay waqtiga weerarka iyo qaraxyo dhacayay.
Ukraine ayaa marar badan guulo ka sheegatay dagaalka ay kula jirto milatariga Ruushka, waxa ayna horey Ukraine u sheegtay in ay bur buriyeen maraakiib nuuca dagaalka ah iyo sidoo kale diyaarado badan.