Wasiir Hore Yusuf Garay ayaa Yiri Farriimaha Saddexda ah ee Galdogob
Shalay waxaan ka qeybgalay Caana-shubka Ugaas Cabdiraxmaan Ugaas Maxamed. Ugaaska oo aan Jaamacadda Ummadda isku soo gaarnay, kana wada tirsaneyn Guddiga ardayda maamula, waa nin sharaf iyo xushmad badan oo fiiro dheer. Allah ha ku guuleeyo masβuuliyadda ballaaran.
Munaasabadda oo marti sharafta ka soo qeyb gashay ay ka yimaadeen Djibouti, Jigjiga, Garisa iyo Soomaaliya woqooyi iyo koofurba, waxay ahayd mid si qurux badan loo soo abaabulay.
Inkasta oo ay joogeen Madax sare oo Federaalka ah iyo Madaxda Puntland oo uu horkacayo Madaxweynuhu, haddana fadhiga xooggiisu wuxuu ahaa Madaxda dhaqanka.
Salaaddiin aad u fara badan ayaa munaasabadda ka hadlay. Ilama aha in ay ku soo tashadeen laakiin ka sokow ducada iyo hambalyada Ugaas Cabdiraxmaan, ku dhowaad kulligood waxay ka sinnaayeen in ay gudbiyaan saddex farriimood.
Jiilaal daba dheeraaday oo Soomaalida ekeeyay dartiis in dibad iyo gudaba loo gurmado dadka iyo xoolahaba, Ilaaheeyna laga baryo roob kheyr qaba.
Colaad beesha martida loo yahay kala dhexeysa beesha xuddinteedu ay tahay Koofurta Gaalkacyo, ay labada Dowlad Goboleed ee Puntland iyo Galmudug, Federaalka, Dhaqanka oo Ugaas Cabdiraxmaan iyo Suldaan Seed ay labaduba goobjoog ahaayeen, iyo waxgaradka Mudug ay ka howlgalaan in la soo afjaro oo si nabad ah la isu dhex maro. Waxaa xusid mudan in beesha Koofurta Gaalkacyo ay wafdi culus ku yimaadeen Goldogob iyaga oo qaarna Gaalkacyo ay baabuur ugu yimaadeen sida Suldaan Seed qaar kalena ay Xamar ka yimaadeen sida Senator Cabdi Qaybdiid, Xildhibaan Dhabancad, Xildhibaan Caga Weyne iyo Ganacsade Liibaan Axmed Xasan.
Farriinta saddexaad waxay ahayd in Dowladdhiska iyo wadajirka Soomaaliya loo istaago. In la fahmo marxaladda uu dalku marayo sidaa darteedna laga gudbo meel ku dhegga iyo goβaannada dadka kala fogeynaya.
Aniga waxay ii ahayd seminar dhowr saacadood ah oo la xiriira dhaqanka, isdhexgalka dhaqanka iyo siyaasadda iyo macaamilka Soomaalida aan ka midka ahay marka aan keligeen isugu fagaare ku kulanno. Kulanka wuxuu tusaale u ahaa sida ay Soomaalidu ugu qurux badan tahay is qaddarinta, wadashaqeynta iyo isku tashiga.
Waxaan u mahadcelinayaa reer Goldogob oo sida loo sharfay si u dhiganta u soo dhoweeyay una sooray martidii faraha iyo culeyska badnayd ee shalay ka qeybgashay Caana-shubka Ugaaska.
Waxaan u mahadcelinayaa Dowlad Goboleedka Puntland iyo Madaxweynaheeda kaalintoodii munaasabadda siiba ciidammada Amniga oo gacanta ku hayay amniga shirka.