Guddoomiye ku xigeenka Amniga & Siyaasadda Maamulka Gobolka Banaadir Maxamed Axmed Diiriye Yabooh oo ka hadlay Munaasabad ka dhacday Aqalka Dowladda Hoose ayaa sheegay in baahida loo qabo dhammaystirka Dastuurka si looga gudbo qabyo-qoraalka uu in muddo ah uu jira.
Yabooh ayaa sheegay in ka maamul Gobolka Banaadir ahaan uu soo dhawaynayo Guddigii kala duwanaa ee Muqdisho ku yeeshay shirka ay uga arrinsanayeen Sidii Kumeel-gaarka looga saari lahaa Dastuurka Dalka.
Maxamed Axmed Diiriye, Guddoomiye ku xigeenka Amniga & Siyaasadda Maamulka Gobolka Banaadir ayaa intaas ku daray in tallaabo bogaadin mudan tahay in laga shaqeeyo hagaajinta Dastuurka Dalka iyada oo muhiimad gaar ah la saarayo.
“Maamulka Gobolka Banaadir waxa uu rabaa in uu ka qayb-qaato in Dastuurka Dalka uu ka baxo qabyo-qoraalka ama kuleem-gaarnimadii in muddo ah uu jiray, Maamulku waxa uu qayb ka ahaa Guddiyadii kala duwanaa ee saddexda maalmood fadhiyay” ayuu yiri Guddoomiye ku xigeenka Amniga iyo Siyaasadda Maamulka Gobolka Banaadir Maxamed Axmed Diiriye Yabooh.
Labada Gole ee Baarlamaanka 11aad ee Jamhuuriyadda Federaalka Soomaaliya ayaa dhexda ka galay dooddaha ku saabsan cutubyada 1aad ilaa 4aad ee Dastuurka Dalka waxa ay Xildhibaannadu & Senarrada Aqalka Sare ka falcelinayaan qodobada ay doodda ka qabaan.