Lataliyaha Madaxweynaha Jamhuuriyadda Federaalka Soomaaliyeed ee arrimaha Dastuurka Xuseen Sheekh Maxamuud ayaa ka hadlay falcelinta iyo doodaha kasoo laabtay dib u furista Dastuurka ee cutubyadiisa 1aad ilaa 4aad.
Xuseen ayaa sheegay in dood laga keeni karo in Dalka uu u guurayo nidaamka Madaxweyne iyo ku xigeenkiisa iyo in uu sii ahaayno Madaxweyne & Ra’iisul Wasaare balse wixii ka baxsan arrintaasi aanay ahayn dood ama soo jeedin.
Waxa uu soo dhoweeyay fikirka dad badan ay ka dhiibanayaan ee dhinaca wanaagsan u socda maadaama Dastuurka uu yahay heshiis bulsho sidaas awgeed cid weliba oo wax kusoo kordhinaysa ama dood ka qabta lasoo dhawaynayo.
Lataliyaha Madaxweynaha ee Arrimaha Dastuurka ayaa wax laga wanaagsan yahay ku tilmaamay in Doodaha Siyaasiyiinta qaar ee shakiga abuuraya iyaga oo ku doodaya in aanay la joojin waqtigii dastuurka la furi lahaa ama aanay xiligaan muhiim ahayn.
“Howshaan samaynta & dib u eegista Dastuurka waa howl qaran oo muddo soo socotay, Siyaasi kasta oo Soomaaliyeed wuu la socdaa wuuna danaynaynaa in uu ka qayb-qaato, Dabcan waxa aan aaminsanahay in Dad Soomaaliyeed ay ka doodaan oo aragti ay ka dhiibtaan oo mid ka duwan Dowladdu dhiibtaan waa wax loo baahnaa lama yaabayno oo waan soo dhawayneenaa in aragtiyo kala duwan la arko” Xuseen Sheekh Maxamuud Lataliyaha MW JFS Arrimaha Dastuurka.
“Labo in aan kala qaadno ayaa u baahanahay, Qodobada Nuxurka gudaha ku jira, qodobkaan sidaan halaga dhigo, Dalkaan waxaa anfacaya nidaam madaxtooyo, maya waxaa anfacaya Mid Baarlamaani ah, Dooddu waa in ay sidaas ahaataa, Laakiin haddii Dooddu noqoto Dastuurka intee loola ordaa? Maxaa Baarlamaanka loo geeyay? Maxaa laga falaa? Dastuurku muhiimadda ma ahan oo hadda waqtigiisu lama joogo, waa lala soo degdegay, haddii sheekadu sidaas tahay waxa aan u malaynayaa Dood dhaxalgal ah ma ahan” Ayuu hadalkiisa kusii daray Xuseen Sheekh Maxamuud.
Labada Gole ee Baarlamaanka 11aad ee Jamhuuriyadda Federaalka Soomaaliya waxaa horyaalla cutubyada 1aad ilaa 4aad ee Dastuurka Kumeel-gaarka ah ee Dalka, kulan weliba dood iyo soo jeedin ayaa la siiyaa Xildhibaannada & Senatarada Aqalka Sare.