Ciidamada Jubbaland ee daacadda u ah Axmed Madoobe ayaa la xaqiijiyey inay qabsadeen inta badan magaalada Raaskambooni ee gobolka Jubbada Hoose.
Dagaal soo bilowday saakay oo dhowr jiho ay ka soo qaadeen ciidamada Jubbaland ayaa sababay in galabta Raaskambooni ay gashay gacanta Axmed Madoobe, waxaana dib u gurasho sameeyey ciidamada qaranka.
Waxaa maanta dhacay dagaal la isku riiqmay, waxaana adkaatay in Raaskambooni ay ka degaan diyaaradaha sida gurmadka iyo saanadda ciidan ee dowladda.
Ciidamada dowladda federaalka oo ka dagaalamayey afaafka hore ee deegaanka Raaskambooni ayaa gabal-dhicii dib u gurasho sameeyey, waxayna isugu tageen dhinaca dambe ee magaalada ee xiga xuduudda Kenya.
Barta Twitter-ka ee Hey’adda ka hortagga Dambiyada Argagixiso ee dowladda Kenya ayaa lagu baahiyey sawirrada askar ka tirsan ciidamada dowladda Soomaaliya oo isku dhiibay ciidamada Kenya, kadib markii ay ka gudbeen xuduudda.
Sawirrada ayaa muujinaya ciidamada oo hubkooda dhigaya iyo kuwa Kenya oo soo dhaweynaya, xaaladda Raaskambooni in xog rasmi ah laga helo ayaa aad u adag, maadaama aysan jirin wax isgaarsiin ah.
Jubbaland ayaa maanta dowladda federaalka ku eedeysay in dagaalka ay u adeegsatay diyaarado Drone ah, iyagoo ku andacooday in tallaabadaasi ay ka hor imaaneyso qaadista cunaqabateyntii hubka.
Dowladda federaalka ayaa dhankeeda Jubbaland, gaar ahaan Axmed Madoobe ku eedeysay inuu la heshiiyey Al-Shabaab, isla markaana ay u ogolaadeen inay dhex maraan ciidamadiisa oo aroortii hore ee saakay weerar ku qaaday ciidamada qaranka.
Dowladda Soomaaliya ayaa 20-kii cisho ee lasoo dhaafay Raaskambooni diyaarado ku geyneysay ciidanka maanta ku jabay dagaalka, ciidanka dowladda hadii ay si rasmi ah ugu jabaan dagaalka Raaskambooni, waxay gelayaan xaalad go’doon ah oo saameyn culus ku yeela doonta.
