Guddoomiyaha Gobolka Banaadir, ahna duqa Muqdisho Yuusuf Madaale ayaa habeen ka hor tegay maqaayad ay isku balansadaan dad u badan saraakiil amni oo rag iyo dumar isugu jira, kuwaas oo halkaas ku sameeya waxyaabo ka basan anshaxa suuban Soomaaliyeed iyo diinta.
Yuusuf Madaale ayaa gudaha u galay maqaayadaas oo ku taalla agagaarka hotelka Afrik ee isgoyska KM4 ayaa la sheegay inuu uleeyey raggii iyo dumarkii joogay maqaayadda.
Xubno ka tirsan xafiiska Guddoomiye Madaale ayaa Caasimada Online u sheegay in maqaayadaas ay aheyd mid leyrarku u densan yihiin oo lagu isticmaalayey nooc kasta oo daroogo ah.
Dadka joogay waxay u badnaayeen saraakiil ka tirsan hey’adaha ammaanka iyo dhalinyaro kale oo ka shaqeysa xafiisyada hey’adaha kala duwan ee dowladda.
Xubnaha noo waramay waxay sheegeen in meesha ay ku yaaliin qolal badan oo mugdi ah, halkii qolba waxaa gelaya labo qof oo kaliya, iyadoo aan la ogoleyn in qof kale uu ka daba-galo, waxaana u densan dhamaan leyrarka.
Guddoomiye Madaale oo Budkiisa wata ayaa maqaayadaas fisqigu ka socday mid mid u galay, kadibna wuxuu banaanka isugu keenay dadkii ku jiray, kuwaas oo isugu jiray rag iyo dumar.
Guddoomiyaha ayaa ka naxay gabdhihii halkaas lagu heystay, wuxuuna mid mid ula xiriiray waalidkood, isagoo u sheegay xaaladda ay gabadhoodu ku sugan tahay, kuna wargeliyey inuu xirayo.
Guddoomiye Madaale ayaa Muqdisho ka wada howlgalkaan lagu suulinayo faaxishada, wuxuuna horay u galay maqaayado iyo hoteello ku yaalla degmada Hodan iyo Xeebta Liido, halka maqaayadaan uu habeen hore galay ay ku tallo Wadajir, gaar ahaan aagga koontoroolka NISA ee u dhow hoolka Sahal ama Hotel Afrik.