Hay’adda la socota dhaqdhaqaaqa maraakiibta iyo amaanka badda lagana leeyahay dalka Britain laguna magacaabo Ambrey ayaa sheegtay in markab maraayay xeebaha Soomaaliya ay koox hubaysani la wareegeeen.
Sidoo kale Hay’adda La socodka Howgalada Ganacsi ee Badda ee Ingiriiska ee marka magaceeda lasoo gaabiyo loo yaqaanno (UKMTO) ayaa iyadana sheegtay in gacan ku haynta markabka lagula wareegay meel dhanka bari kaga beegan magaalada Muqdisho 600 oo Nautical Mile oo dhiganta 1,111 KM.
Ambrey waxay sheegtay in tirada dadka markabka la wareegay ay dhanaayeen 20 qof, markabkuna uu watay calanka dalka Bangladesh. Isagoo kusii jeeday magaalada Hamriya ee dalka Imaaraadka Carabta kana yimid Caasimaddda Maputo ee dalka Mozambique.
Xaalka shaqaalahii markabka saaraa ayaanse la ogeyn siduu yahay, waxanaa jira warar is khilaafsan oo sheegaya halkeey aadeen. Ayay warbixinta ku sheegtay Ambrey.
Markabkan hadda la afduubtay, ayaa waxaa saaraa sida la sheegay dhuxul waxaana markabka lagu magacaabaa MV Abdullah.
Warbaahinta Bangladesh ayaana sheegtay in ay saaraayeen 23 qof oo dhammaantood u dhashay dalka Bangladesh.
Sidoo kale waxay warbaahinta Bangladesh sheegtay in markabka dadkii saaraa ay lasoo xidhiidheen maamulka shirkadda ayna nabad qabaan.
Maamulaha shirkadda oo u waramay warbaahinta gudaha dalkaas ayaa sheegay in xiriir uu ka helay kabtanka markabka.
Shirkadda ayaa warbaahinta u xaqiijisay in cidda afduubatay markabka ay tahay burcad-badeed Soomalai ah, ayna markabka la aadeen meel aan ahayn jihadii uu u socday.
Burcadda ayuu sheegay in ay la soo xiriireen iyaga oo madax furasho dalbanaya.
Shirkadda ayaa sheegtay in ay isku dayayaan sidii ay ku soo badbaadin lahaayeen shaqaalaha iyo markabkaba, iyaga oo sheegay in ay khibradd fiican u leeyihiin sida looga hortago dhacdooyinka nuucaan oo kala ah.
Buracadda Soomaaliya ayaa la soo tabinayay baryihii ugu dambeeyay in ay afduubanayeen doomo kaluumeysi, kuwaas oo ay doonayeen in ay ku soo qabtaan maraakiibta waawayn ee badwaynta dul mushaaxaya.
XIGASHADA SAWIRKA,GETTY IMAGES
Haddii warbixintan la xaqiijiyo waxay shidaalinaysaa cabsida laga qabo dib-u-dhalashada budhcad badeeda ee badweynta Hindiya.
Budhcad badeeda ayaa xeebaha Soomaaliya Khalkhal ku galiyay maraakiibtii maraysay horaantii 2008-da iyadoon, balse howlgalo balaadhan oo ay siwadajir ah u sameeyeen dowladaha reer galbeedka ayaa hoos u dhigay weeraran iyadoo 2014-kii lagu guuleystay in budhcad badeeda howlgaladooda iyo dhaqdhaqaaqooda la joojiyo, kadib maraakiib badan oo ay afduubteen malaayiin lacag ahna ka qaadeen.
Bishii December labo dhacdo ayaa lagasoo wariyay xeebaha Soomaaliya. Mid waxuu la xidhiidhay markab ganacsi oo ay ku weerareen meel u dhow magaalada xeebta magaalada Eyl ee gobolka Bari. Midka kalena waxuu ahaa markab sitay calanka dalka Malta kaas oo isna la afduubtay una dhaqaaqay ugu danbayn xeebta Soomaaliya.
Biyaha Soomaaliya ayaa lagu arkay sare u kac budhcad badeedda sanadkii 2011-kii Hay’adda Qaramada Midoobay ayaana sheegtay in 160 weerar oo maraakiibta lagu qaaday la diiwaangeliyay. Weerada ayaase hoos u dhacay kadib markii howlgalo ciidamada Maraykanka iyo kuwa xulafadiisa ah ay yimaadeen biyaha Soomaaliya.
XIGASHADA SAWIRKA,GETTY IMAGES
Markabkaan la afduubtay ayaa la sameeyay sanadkii 2016-kii waxaana markiisii koobaad loo bixiyay ‘Golden Hawk’ kadib markuu ku biiray maraakiibta shirkadda SR Shipping, sanadkii teggay ayaana loo bixiyay magaca ‘MV Abdullah’.
Isla shirkadaan markab keeda ah oo lagu magacaabo MV Jahan Moni ayaa xebaha Soomaaliya lagu afduubtay 5-december 2010 kii, madax furasho ay weydiisteen budhcaddu markii la bixiyayna markabka ayay sii daayeen burcaddu.
Afduubka markabkaan ayaana imaanaya xilli maraakiibta maraysa Gacanka Cadan ay sidoo kale weeraro joogto ah kala kulmaya weerar joogto ah Xuutiyiinta Yemen.
Qabsashada markabkana waa kii labaad ee sanadkaan lagasoo tabiyo xeebaha Soomaaliya.