Muuqaalada saaka laga soo duubay garoonka diyaaradha Muqdisho ayaa muujinaya jahwareerka ka taagan garoonka diyaaradha ee magaaladda Muqdisho. Boqolaal ruux oo shacab ah oo doonayay inay u dhoofaan gobolada dalka ayaa ku xaniban gudaha garoonka.
Mid kamid ah dadkaas aya aah xildhibaan Cali Siciid Fiqi oo ka tirsan Golaha Shacabka Soomaaliya, isaga oo BBC da u sheegay in uu dhawr saacadood ku xaniban yahay qaybta lagu sugo duulimaadka.
“Saaka aroortii hal saac iyo bar ayaan imid garoonka diyaaradha, markaan imid ayaa nalgu yiri, ‘war maanta diyaarad in ay jireyso iyo in kale lama oga’…ilaa iyo hadeertaan oo ay mareyso tobankii iyo 11 daqiiqo wax akhbaar ma hayno,” ayuu BBC da u sheegay xildhibaan Fiqi oo ku sugnaa qaybta ay gaarka ah ee ay ka baxaan madaxda ee ku taalla garoonka Aadan Cabdulle.
Maalintii labaad ayaa waxaa hakad ku jira duulimaadyada gudaha ee ka bixi jiray garoonka Aadan Cabdulle ee magaalada Muqdisho, kaddib markii shirkaddaha diyaaraddaha iyo Wasaaradda Gaadiidka iyo Duulista Hawadu, isku khilaafeen lacago dheeraada oo lagu soo rogay dadka ka dhoofaya garoonka.
Maamulka Ururka Diyaaraddaha ayaa sheegay in lagu soo rogay qof kasta oo ka dhoofaya garoonka Aadan Cabdulle ee ku socda gobollada wadanka lacag dhan $9, iyagoo maraya nidaam cusub oo ay dajisay shirkad gaar loo leeyahay oo ay ruqsad ay siisay wasaaradda duulista hawada.
Shirkadduhu waxay sheegeen in ay culeys wayn ku tahay dadka diyaaradahooda raacaya, lacagta dheeraadka ah ee la saaray.
Xildhibaan Fiqi ayaa hadalkiisa raaciyay in ilaa iyo haatan aan dadweynaha ku xaniban garoonka ee isagu uu ku mid yahay aan loo sheegin wax xog ah oo ku saabsan in duulimaadyada aan sugayaan la fasixi doono iyo in kale.
XIldhibaan Cabdiraxmaan Cabshakuur oo ka mid ah siyaasiyiin ka hadlay xaalka cakiran ee ka taagan garoonka diyaardaha ee Muqdisho ayaa dawladda ku booriyay in ay aan dhayalsan dhibaatada ay la kulmayaan shacabka ku xaniban garoonka diyaaradha.
“waxaan u soo jeedinayaa guddiga gaadiidka ee labada aqal ee baarlamaanka in ay arrinkan dedeg u soo farageliyaan”, ayuu ku yiri war uu ku soo daabacay bartiisa Facebook.
Shalay ayaa sidoo kale galinkii hore waxaa hakad galay duulimaadyada aadi jiray gobolada dalka, balse galinkii dambe ayay baxeen duulimaadyada qaar.
XIGASHADA SAWIRKA,OPM SOMALIA
Muxuu salka ku hayaa khilaafku?
War ay soo saareen Midowga Shirkadaha Diyaaradaha ee Soomaaliya dhawaan ayay ku sheegeen in wasaarada Gaadiidka iyo Duulista Hawada ee Soomaaliya ay ku amartay “in aan xogta rakaabka diyaaradaha (Manifest) kushubno system wasiiraddu noogu sheegtay inuu yahay mid amni”.
Balse waxay sheegeen in ay dib ka ogaadeen in uu yahay “[Nidaam] ay leedahay shirkad ganacsi oo lagu magacaabo Hornlink”
Waxay sheegeen in sidoo kale uu nidaamka dalbanayo alacag sagaal doolar ah in shirkaduhu ka bixiyaan tikid kasta oo ay jaraan, arrintaas oo ay sheegeen in ay sare u qaadeyso qiimaha tkidhada caqabadna ay ku noqoneyso iyaga iyo macaamiishoodaba.
Wasaaradda Gaadiidka iyo Duulista hawada ee Soomaaliya ayaan la xiriirnay si aan wax uga waydiino dhamaan cabashooyinkaan. Balse nooma aysan suuragalin inaan helno. Sidoo kale ma jiro war rasmi ah oo ay soo saartay wasaaraddu.
Balse ra’iisulwasaaraha Soomaaliya Xamse Cabdi barre oo maanta gaaray garoonka diyaaradaha ayaa ku amray wasaaradda iyo maamulka garoonkaba in ay fasaxaab=n dhamaan duulimaadyada xaniban.
Shirkadaha ayaa sheegay in ay aaminsan yihiin in nidaamkan cusub uu yahya mid amni oo faa’iido leh.