Marxaladaha Nolosha Insaanka waxaa ugu qaalisan dhalinyaro-nimada oo ah xiliga ugu firfircoon ee uu qofka u shaqeysan karo aduun iyo aakhiraba, Maxaad u maleyneysaa xanuunka ay leedahay qof dhalinyaro ah oo aragiisii si fudud ku waayey?
Muumin Axmed Ciise waa Soomaali 43 sano jir ah, Indhoole ah, kana soo jeeda qoys sabool ah, waxaana uu leeyahay Xaas iyo dhowr caruur ah oo yar yar.
Dhibanaha ayaa sheegay in 10 sano ka hor uu ahaa qof si caadi ah wax u arka oo qoyskiisa iyo caruurtiisa u shaqeeya, rootina ku iibin jiray Suuqyada Muqdisho qaarkood si uu u maareeyo nolosha qoyskiisa.
Hase ahaatee noloshiisa ayaa mar kaliya isbedeshay ka dib markii ay si lama filaan ah u dilaacday ishiisa Midig oo uu ku shubay Daawo markii dambe la ogaaday iney khalad aheyd oo uu dhaqtar u soo qoray.
“Isha kale ee bidixda ah iyana waxaa dul-fuulay Caad sababay aragti la’aan, waxaan kala garan karaa oo kaliya mugdiga habeenkii iyo iftiinka maalintii wax kale ma arki karo” ayuu yiri Muumin.
“Meel madow ayaan soo fariistay, aniga iyo ciyaalkeygana waxaan ku nool nahay guri jiingad ah oo ku yaalla degmada Kaxda, duruufo nololeed oo aad u adagna waan wajaheynaa ” ayuu intaa ku daray Muumin.
Waxaa uu sheegay in bishii July ee sanadkii hore 2023 uu booqday Isbitaalka Al-Ihsan ee magaalada Muqdisho, uuna la kulmay Dr. Shiine oo ah dhaqtar Soomaaliyeed oo ku taqasusay cudurada indhaha.
“Dhaqtarka waxaa uu ii sheegay in isha bidix ay leedahay rajo badan, ayna u baahan tahay in qaliin lagu sameeyo bu’da isha (Keratoplasty) waxaana qaliinkaas sameynaya dhaqtar Masaari ah oo la yiraahdo Mustafa Rajab kaasoo dhowrkii biloodba mar yimaada dalka, wuxuuna ku sameeyaa $-3000 (Saddex kun oo Dollar) nasiib daro lacagtaas waan awoodi waayey, wuxuuna isbitaalku ii qoray warqad arrintaas cadeyneysa” ayuu yiri Muumin (Eeg Lifaaqa hoose)
Isagoo joogay hoyga ay ku nool yihiin isaga iyo qoyskiisa waxaa uu sheegay Muumin inuu jeclaan lahaa mar labaad inuu arko isagoo caruurtiisa u shaqeysanaya ishiisa bidix arageedana dib u helay.
“Waxaan ka codsanayaa walaalahey muslimiinta ah ee caalamka ku nool inta awoodi karta, sida ganacsatada, muxsiniinta, Jaaliyadaha dibeda iyo inta ILAAHAY wax siiyey iney ALLE dartii wax iigu qabtaan” ayuu hadalkiisa ku soo xiray Muumin oo wejigiisa ay ka muuqatay murugo badan.
Walaal Haddii aad ILLAAHAY dartii u caawineyso dhibane Muumin Axmed Sheekh Ciise si toos ah kala xiriir telefankan oo sidoo kale leh Whatsapp +252-615406674
——————————————————————————————–
HOOS KA DAAWO XAALADA MUUMIN & WARQADA ISBITAALKA AL IHSAN
Xafiiska Shabakada Allbanaadir.com