Madaxweynaha Ruushka Vladimir Putin ayaa hoggaamiyaha Kuuriyada Waqooyi Kim Jong Un siiyay gaari nooca raaxada ah oo uu Ruushka sameeyay isaga oo u guddoonsiiyay qaab hadiyad ahaaneed.
Warbaahinta dowladda Pyongyang ayaa sheegtay in gaadiidkan raaxada ah ee nooca limousine-ka ah la gaarsiiyay guddomayaal ka socday Kim axaddii.
Afhayeenka Kremlin-ka Dmitry Peskov ayaa markii dambe xaqiijiyay hadiyadda, isagoo sheegay in ay ahayd nooca raaxada oo dhameystiran oo ah nooca uu isticmaalo Mr Putin laftiisa.
Labada dal ee ka go’doonsan qaybo badan oo caalamka kamida ayaa xiriir dhow yeeshay tan iyo markii Ruushka uu ku duulay dalka Ukraine.
Kuuriyada Waqooyi ayaa loo malaynayaa in ay Ruushka gacan ka siinayso dagaalka iyo dhinaca madaafiicda iyo gantaallada, inkastoo cunaqabatayn caalami ah lagu soo rogay labada waddan.
Mr Putin ayaa ku soo dhoweeyay Mr Kim magaalada Vostochny Cosmodrome ee bariga fog ee Ruushka bishii Sebtembar ee la soo dhaafay, taasoo ahayd safarkii ugu horreeyay ee dibadda ah oo uu u baxo muddo afar sano ah.
Booqashadaas, hoggaamiyaha Kuuriyada Woqooyi waxa uu ku kormeeray gaadiid uu leeyahay Mr Putin ee uu kamid yahay midka hadiyadda haatan loo siiyay, isagoo lagu casuumay inuu ku fadhiisto kursiga dambe. Waxay kaloo hadyad ahaan u kala qaateen qoryo.
XIGASHADA SAWIRKA,GETTY IMAGES
Kim Jong-un ayaa la rumeysan yahay inuu yahay nin aad u xiiseeya baabuurta, isla markaana uu sameeyo uruurinta baabuurta raaxada ee ajaanibka ah.
Yo Jong oo la dhalatay Kim ayaa sheegtay in “hadiyaddu ay muujinayso xiriirka gaarka ah ee ka dhexeeya hoggaamiyeyaasha ugu sarreeya” labada dal, sida ay sheegtay wakaaladda wararka ee Kuuriyada Waqooyi ee KCNA.
Balse wasaaradda arrimaha dibadda ee Kuuriyada Koonfureed ayaa sheegtay in haddiyaddu ay jabinayso cunaqabataynta golaha ammaanka ee Qaramada Midoobay ay ku soo rogtay Kuuriyada Waqooyi, taas oo mamnuucday saadka noocyada baabuurta qaarkood oo ay ku jiraan baabuurta raaxada.
Vladimir Putin iyo Kim Jong Un wax badan ayay wadaagaan.
Labadaba Ruushka iyo Waqooyiga Kuuriya ayaa lagu eedeeyay inay noqdeen “dowlado qallafsan”.
Labada dawladood waxay ay xifaaltan iyo xurguf adagi kala dhaxaysaa Mareykanka.
Inta badan cadawga guud wuxuu isu soo dhawayn karaa madaxda.
Waa si ka duwan madaxweynihii hore ee Mareykanka Donald Trump, oo mar ku dhawaaqay in isaga iyo Kim Jong Un ay “si kalgacayl leh uwada macaamileen”.
Kuuriyada Woqooyi waxay leedahay warshado difaac oo aad u weyn oo leh awoodo wax soo saar oo baaxad leh. Iyada oo dagaalka Ruushka ee Ukraine uu sii socdo.
XIGASHADA SAWIRKA,REUTERS
Mareykanka ayaa ku andacoonaya in wadahadalada hubka ee u dhaxeeya Ruushka iyo Kuuriyada Waqooyi uu si “firfircoon usii socday” iyadoo la sheegay in Ruushka uu raadinayo sahayda rasaasta iyo madaafiic dheeraad ah.
Ma jiro wax xaqiijin ah oo ka soo baxay saraakiisha Ruushka. Laakin tilmaamo badan oo aan qarsoonayn ayaa jira kuwaas oo muujinaya in Ruushka iyo Kuuriyada Waqooyi ay doonayaan in ay kor u qaadaan iskaashiga milatari.
Dabayaaqadii bishii Luulyo Sergei Shoigu waxa uu noqday wasiirkii gaashaandhigga ee ugu horreeyay ee Ruush ah oo booqda Kuuriyada Waqooyi tan iyo markii uu burburay Midowgii Soofiyeeti, markaas oo uu ka qayb galay munaasabado lagu xusayay sannad-guuradii 70-aad ee ka soo wareegtay markii la aasaasay ciidammada Kuuriya.
Kim Jong Un ayaa ciyaaray doorka hagitaan ee safarkaas markii uu Mr Shoigu tusayay agagaarka goob uu ka socday bandhig hub. Wasiirka gaashaandhiga ayaa sidoo kale ka dhawaajiyay in dhoolatus militari oo wadajir ah uu socdo.