Sicir-bararka
Harris ayaa sheegtay in ahmiyaddeeda maalinta koowaad ay noqon doonto isku dayidda yareynta qiimaha cunnada iyo guryaha ee qoysaska shaqeeya.
Waxay ballan-qaadday inay mamnuuci doonto badeecadaha qiimahoodu aadka u sarreeyo, caawin doonto dadka markoodii ugu horreysay guri iibsanaya, kordhin doonto bixinta guryaha ayna sare u qaadi doonto mushaarka ugu yar.
Sicir-bararka ayaa kordhay inta uu Biden xilka hayo, si la mid ah dalal badan oo galbeed, waxaa qeyb ka ah saameynta ka dhalatay Covid iyo dagaalka Ukraine.
Trump ayaa ballan qaaday inuu “soo afjari doono sicir-bararka uuna mar kale Mareykanka ka dhigi doono mid noloshiisa la awoodo” markii wax laga weydiiyayna wuxuu sheegay in shidaal qodis badan oo la sameeyo ay dhimi doonto qiimaha shidaalka.
Wuxuu ballan qaaday in qiimaha dul-saarka uu yareyn doono, taasoo ah wax madaxweyne uusan xakameynin, wuxuuna sheegay in musaafurinta muhaajiriinta aan sharciyeysneyn ay fududeyn doonto cadaadiska saaran guryaha. Dhaqaale-yahannada ayaa ka digay in ballan qaadkiisa ah inuu canshuur badan kusoo rogi doono waxyaabaha lasoo dhoofiyo ay sare usii qaadi karto qiimaha.
Canshuuraha
Harris waxay dooneysaa inay canshuurta ku kordhiso ganacsiyada waaweyn iyo dadka Ameerikaanka ah ee sanadkii sameeya lacag dhan $400,000 (£305,000).
Balse waxay sidoo kale daaha ka qaadday tiro tallaabooyin ah oo fududeyn kara culeyska canshuurta ee qoysaska saaran.
Waxay khilaaftay siyaasadda Biden, waxayna taageersan tahay in kordhin dhexdhexaad ah la sameeyo oo ka kacaysa 23.6% gaareysana 28% cmarka loo barbardhigo tan Biden oo ah 44.6%.
Trump ayaa soo jeediyay tiro dhimidda canshuurta oo gaareysa tirilyanno, ayna ku jiraan sii wadidda dhimiddii 2017 oo inta badan caawisay maal-qabeennada.
Ilmo iska soo rididda
Harris ayaa xuquuqda ilmo iska soo ridda ololaheeda udub dhexaad uga dhigtay, iyadoo sii wadda u ololeynta sharci dhowri doona xuquuqda taranka ee guud ahaan dalkaas.
Trump ayaan la dalaa-dhacayay inuu farriin joogto ah ka dhiibto ilmo iska soo rididda.
Saddexda xaakim ee uu Maxkamadda ugu Sarreysa u magacaabay intii uu madaxweyne ahaa ayaa ka dambeeya inay meesha ka saaraan xaqa dastuuriga ah ee ilmo iska soo rididda.
Socdaalka
Harris ayaa loo xil-saaray wax ka qabashada waxa sababay xasaradda xadka koofureed waxayna gacan ka geysata in balaayiin doollar oo lacago gaar ah la uruuriyo si maalgashi goboleed loogu sameeyo taasoo looga gol leeyahay dhimidda qulqulka waqooyiga.
Tiro aad u badan oo dad ah ayaa kasoo gudbay Mexico dhammaadkii 2023 balse tirada ayaa hoos u dhacday wixii markaa ka dambeeyay. Ololahan, ayay sii adkeysay halka ay ka taagan tahay waxayna xoojisya khibraddeeda dacwad-ooge ahaan oo ku sugan California oo ay la tacaali jirtay mukhalasiinta dadka tahriibiya.
Trump ayaa wacad ku maray inuu xadka xiri doono isagoo dhammeystiraya dhismaha derbiga kordhinayana ciidanka halkaa jooga. Balse wuxuu ku boorriyay Jamhuuriyiinta inay la yimaadaan sharci adag oo ka dhan ah socdaalka, ay taageertay Harris. Waxay sheegtay in sharcigaas ay dib usoo nooleyn doonto haddii la doorto.
Wuxuu sidoo kale ballan-qaaday musaafurintii ugu ballaarneyd ee muhaajiriinta aan diwaan-gashaneyn inta la ogyahay taariikhda Mareykanka. Khubarrada ayaa BBC u sheegay in tan ay wajihi karto loolan dhanka sharciga ah.
Siyaasadda arrimaha dibadda
Harris ayaa wacad ku martay inay taageeri doonto Ukraine “ilaa inta ay qaadaneyso”. Waxay sheegtay, haddii la doorto, inay hubin doonto in Mareykanka ma aha Shiinaha uu ku guuleysan doono “tartanka Qarniga 21aad”.
Waxay muddo dheer u ololeyneysay xalka labo dal oo u dhaxeeya Israa’iil iyo Falastiiniyiinta, waxayna ku baaqday soo afjaridda dagaalka Qasa.
Trump ayaa leh siyaasad arrimaha dibadda oo go’doon ah wuxuuna doonayaa in Mareykanka inuu ka fogaado isku dhacyada meelaha kale ee dunida.
Wuxuu sheegay inuu aoo afjari doono dagaalka Ukraine muddo 24 saacadood gudahood ah isagoo u maraya wada xaajoodyo lala galo Ruushka, taasoo ah tallaabo ay Dimuqraaddiyiintu ku sheegeen inay awood sii siin doonto Vladimir Putin.
Trump ayaa caddeeyay inuu taageere u yahay Israa’iil balse wax badan kama dhihin sida uu usoo afjari doono dagaalka Qasa.
Ganacsiga
Harris ayaa cambaareysay siyaasadda aan waxba reebin ee Trump ee canshuur dheeri ah loogu soo rogayo waxyaabaha lasoo dhoofiyo, iyadoo ugu yeertay canshuur qaran oo loogu talo galay qoysaska shaqeeya taas oo qoys walba sanadkii ugu kici doonta $4,000.
Waxaa laga filayaa hannaan kaaka duwan oo lagu canshuurayo waxyaabaha lasoo dhoofiyo, iyadoo la joogteynayo canshuuraha maamulka Biden-Harris ay kusoo rogeen qaar ka mid ah badeecadaha Shiinaha sida gawaarida korontada ku shaqeeya.
Trump ayaa canshuuraha ka dhigay udub dhexaadka ololihiisa si uu u dhowro ganacsiyada Mareykanka. Wuxuu soo jeediyay canshuur 10-20% ah oo lagu soo rogayo inta badan badeecadaha dibadda laga keeno, iyo kuwo aad u sarreeya oo lagu soo rogo kuwa Shiinaha ka yimaada.
Wuxuu sidoo kale ballan qaaday inuu shirkadaha ku qancin doono inay joogaan Mareykanka oo ay badeecooyin soo saaraan, iyadoo laga qaadayo canshuur yar.
Cimilada
Harris, madaxweyne ku xigeen ahaan ayaa gacan ka geysatay in la meel mariyo Sharciga Yareynta Sicir-bararka, kaasoo keenay in boqollaal balaayiin oo doolar la geliyo tamarta la cusbooneysiin karo.
Trump, intii uu Aqalka Cad joogay, wuxuu la yimid boqollaal hab oo deegaanka lagu dhowrayo, waxaana ka mid ah xaddidaadda gaaska carbon dioxide ee kasoo baxaya warshadaha iyo gawaarida.
Ololahan ayuu ku ballan qaaday inuu wax uga qaban doono gawaarida korontada ku shaqeeya.
Daryeelka caafimaadka
Harris ayaa qeyb ka ahayd maamulka Aqalka Cad oo yareeyay qiimaha dawooyinka iyagoo qiimaha insulin-ta ka dhigay $35.
Trump, oo mar walba ballan ku qaadi jiray inuu wadi doono sharciga Affordable Care Act, ayaa sheegay in haddii la doorto uu keliya sii hagaajin doono, isagoo aan wax gaar ah sheegin. Sharciga ayaa loogu talogalay in caymis caafimaad uu siiyo malaayiin qof oo dheeraad ah.
Sharciga iyo kala dambeynta
Harris ayaa isku dayday inay is barbardhigto khibraddeeda dacwad-ooge ahaan iyo xaqiiqda ah in Trump lagu eedeeyay dembi.
Trump ayaa ballan ku qaaday inuu baabi’in doono kuwa daroogada ka ganacsada, burburin doono rabshadaha burcadda uuna dib u dhisi doono magaalooyinka ay Dimuqraadiyiintu maamulaan oo uu sheegay inay dembiyadu ku badan yihiin.
Wuxuu sheegay inuu adeegsan doono milatariga ama Ilaalada Qaranka.
Hubka
Harris ayaa arrin muhiim ah ka dhigtay ka hortagga rabshadaha hubka la isku adeegsado, iyo in iyada iyo Tim Walz – oo labadooduba ay hub heystaan – ay aalaaba u ololeyn doonaan shuruuc adag. Balse in la ballaariyo hubinta amaba mamnuucidda hubka dhibaatada lagu geysto ay u baahnaan doonto caawinaadda Kongareeska.
Trump ayaa caddeeyay taageerada uu u hayo wax ka beddelkii labaad, ee ah xaqa dastuuriga ah ee heysashada hubka. Mar uu ka khudbeynayay munaasabadda Ururka Qaranka ee Qoriga bishii May, ayaa wuxuu sheegay inuu yahay saaxiibkooda ugu fiican.
Daroogada marijuana
Harris ayaa ku baaqday inaan dembi laga dhigin daroogada marijuana. Waxay sheegtay in dad badan xabsiga la geeyay sababo la xiriira in lagu arkay daroogadan.
Trump ayaa mar walba aan si adag uga hadlin waxa u qorsheysan wuxuuna sheegay inay tahay waqtigii lasoo afjari lahaa xirixiridda aan loo baahneyn ee dadka waaweyn ee lagu arko xaddi yar oo marijuana ah oo ay naftooda u isticmaalayeen.
