Fahad iyo Geelle: Jawaabta Jabuuti ee qoraalkii Fahad Yaasiin
Wasiirka Maaliyadda dalka Jabuuti, Ilyaas Muuse Dawaleh ayaa si adag uga jawaabay eeddii uu Fahad Yaasiin u jeediyey Madaxweynaha Jabuuti, Ismaaciil Cumar Geelle. βMadaxweyne Geelle xanuun maskaxiyan ah ayuu ku riday Fahad iyo kooxdii guuldarreysatay. Taas waxa ay ka dhigan tahay fursad kasta oo ay helaan waxa ay ku muunad xumeynayaan Madaxweyne Geelle,β ayuu ku yiri qoraal uu soo dhigay bartiisa Twitter.
βHaddii ay Ri ku dhimato gobolka Gedo, waxaa dilay Madaxweyne Geelle. Haddi ay duq gabowday ku turun turooto Muuqdisho, Madaxweyne Geelle ayaa ka dambeeya.β
βTaariikhda Ismaaciil Cumar, xumaanta iyo cayda Fahad waxba ka beddeli meyso. Soomaali dhammaanteed ayaa marag ka ah. War ileen cimrigaaga oo dheeraada, geel dhalaya ayuu ku tusaa.β
βRaali ahaada kuwa nacaybka qabow, cuna kaniin madax xanuun,β ayuu yiri wasiir Ilyaas Dawaleh oo bartiisa X oo horay loo oran jiray Twitter ku soo qoray qoraalkan oo uu ugu jawaabayay Fahad Yaasiin.
Hadalka wasiirka ayaa imanaya iyadoo taliyihii hore ee Nabad Sugidda iyo Amniga Qaranka Soomaaliya, Fahad Yaasiin Daaji Daahir oo qoraal dheer la wadaagay bulshada ayaa ku tilmaamay Madaxweynaha Jabuuri, Ismaaciil Cumar Geelle, cadaw soo jireen ah oo ay ummadda Soomaaliyeed leedahay, balse gacal isaga dhiga.
βMar walba istiraatiijiyadda Madaxweynaha Jabuuti waxay ku salaysan tahay balaayo waa la iska moosaa, wuxuuna awood walba galiyaa sida Soomaaliya ay qalalaase joogta ah ula noolaan karto oo dib loogu dhigi karo dhismaha dowlad ka caga dhigata Soomaaliya,β ayuu Fahad ku yiri qoraalka.
Fahad ayaa qoraalka sidoo kale kaga hadlay heshiiskii Itoobiya iyo Somaliland ee badda.
Waxa uu sheegay in madaxweynaha Jabuuti Ismaaciil Cumar Geelle uu wax badan ka ogaa heshiiska badda ee Muuse Biixi iyo Abiy Axmed ay kala saxiixdeen 1-dii bishaan, sidoo kale Fahad ayaa Madaxweyne Ismaaciil ku tilmaamay nin jecel jabka Soomaaliya.
βMarkii uu Abiy Axmed bilaabay inuu ka hadlo sidee Itoobiya ku gaari kartaa badda, waxaa u caddaatay Ismaaciil Cumar Geelle inuu daad culus ku soo wajahan yahay, wuxuuna dajistay qorshe sirdoon iyo mid diblomaasi oo uu isaga leexin karo mawjaddan ku soo jeedda Jabuuti, wuxuuna qaaday tallaabooyin wax tar u leh dalkiisa.β
βKoow: Wuxuu Itoobiya kala hadlay inuu ku qanciyo Soomaaliya ayaan idin la qalqaalinayaa inaad wada gashaan heshiis wax kala badalasho ku dhisan oo ah in Itoobiya ay hesho bad, waxna loogu baddalo Soomaaliya. Qorshahaas, wuxuu kala hadlay Madaxweyne Xasan Sheekh, oo tallaabadaas aanan diidmo ka muujinin, haddana ka cabsaday inuu horay ugu sii socda. Dabeecadda Abiy oo boobsiiska jecel iyo dhaqanka Xasan oo daahista u sifaysan baa dib u dhigay hirgalinta heshiis dhex mara Soomaaliya iyo Itoobiya.β
βDhanka kale, Ismaaciil Cumar wuxuu kula heshiiyey Itoobiyaanka inuu Xasan ku qancinayo inuu u fasaxo in Somaliland iyo Itoobiya ay galaan heshiis ay ku helayso bad iyo dekado, qofka u saxiixayana uu noqdo Muuse Biixi, ayaga oo haysta ogolaashaha Villa Soomaaliya. Sida caadada ah, mar walba Ismaaciil iyo Muuse waa isla socdaan, cidda siran waa Muqdisho.β
βGeelle, saddex qolaba halmar buu gool ka wada dhaliyey. Itoobiya mashruucii bad raadinta wuu ka dhiciseeyey. Muuse Biixi, ceeb iyo fadeexad buu dhex fariisiyay, Soomaaliyana buuq iyo qalalaase muddo soconaya buu ku abuuray. Tan ugu muhiimsan waa in uu iska dadbay damacii Itoobiya oo uu Jabuuti ka leexiyey mawjaddii bad raadinta ahayd,β ayuu sidoo kale qoraalka ku yiri.
Marka laga soo tago arrimaha badda Fahad ayaa qoraalka cinwaan uga dhigay βCiil Walaal: Ismaaciil Cumar Geelle,β isagoona yiri: βMadaxweynaha Jabuuti, haddii Soomalida qaarkeed u taqaanno (Hiil walaal), waxaan anigu u aqaanaa (Ciil walaal)β.
Hadalka Fahad ayaa sidoo kale waxaa ka dhashay falcelino kala duwan oo dhanka baraha bulshada ah.