Wasiirka Wasaaradda Caafimaadka Xukuumadda Federaalka Soomaaliya Dr Cali Xaaji ayaa sheegay in Wasaaraddiisa ay xoogga saarayso la socodka Dawooyinka sida qaldan loogu adeegsado qaab maandoriye ah si looga hortago halista ku horgudban.
Dr Cali Xaaji ayaa sheegay in dawooyinkaan aanay la mamnuuci Karin sabab la xiriirta dadka loogu talagalay in la siiyo balse Dowladda xoogga ay saarayso la dagaalanka dadka sida qaldan u isticmaalka dawooyinkaas sida uu hadalka u dhigay.
Qaababka Wasaaradda Caafimaadka XFS ay u adeegsanayso kahortagga iyo dabagalka dawooyinkaas ayuu ku sheegay in Isbitaallada & goobaha kale ee lagu iibiyo Dawooyinka la weydiinayo isticmaalka sida loo bixiyay.
“In aan xakamayn oo suuqa laga waayo dabcan way iska adag tahay oo Dalka xuduudihiisa way furan yihiin oo muddo ayay qaadanaysaa, waxa aan rabnaa in aan tagno farmashiyeyaasha oo ciddii lagu arko lagula xisaabtamo, isbitaallada waxaa laga rabaa in ay keenaan warqadda isticmaalka, waana in uu yeeshaa dhaqaatiirta saxiixooda ku bixi karto” Ayuu yiri Wasiirka Caafimaadka XFS, Dr Cali Xaaji.
Dawooyin u badan kuwa loo adeegsado xannuunada xaaladaha adag waxaa si qaldan u isticmaalla dad qabatimay isticmaalkooda sida cirbadaha, Kaniiniyaasha iyo dawooyin kale, dadkaas ayaa la kulma dhibaatooyin dhanka caafimaadka.