Wasiirka Arrimaha Gudaha, Federaalka & Dib u heshiisiinta Xukuumadda Soomaaliya Axmed Macallin Fiqi oo khudbad ka jeediyay Shirka looga hadlayo Siyaasadda loo dhan yahay ayaa ka hadlay sooyaalka qaran dhiska, caqabadaha, fursadaha & ahmiyadda iskaashiga uu leeyahay.
Shirkaan oo ah mid u dhaxeeya Xukuumadda Federaalka & Saaxiibada Soomaaliya waxa ay labada dhinac ku kala xog-qaadanayaan xaaladihii u dambeeyay ee dhinaca siyaasadda loo dhan yahay & hiigsiga si dhinac weliba uu doorkiisa ka qaato.
Axmed Fiqi ayaa sheegay in Soomaaliya ay kasoo gudubtay xaaladihii adkaa ee soomaray isla markaana ay haatan tiigsanayso horumar, waxa uu madasha ka sheegay in guullo muhiim ah laga gaaray dagaalka ka dhanka ah ‘AS’ lagana qabsaday 800 oo KM.
Goobahaas laga qabsaday ‘AS’ ayuu Wasiirka Arrimaha Gudaha, Federaalka & Dib u heshiisiinta Xukuumadda Soomaaliya Axmed Macallin Fiqi sheegay in laga hirgeliyay adeegyo kala duwan sida Iskuullo, Isbitaallo, Layrar (Nalal), Biyo, Maxkamado & kuwo kale oo Bulshadu u baahan tahay.
“Ujeedka fadhigeenna kuma koobna in laga doodo Siyaasada loo dhanyahay, balse waa dadaallo wadajir ah oo lagu qaabeynayo helidda Soomaali horumarnsan, adkeysi leh, oo iskuna filan” Sidaasi waxaa yiri Wasiirka Arrimaha Gudaha, Federaalka & Dib u heshiisiinta Soomaaliya Axmed Macallin Fiqi.
Shirarka u dhaxeeya Dowladda Federaalka Soomaaliya & Saaxiibadeed ayaa inta badan diiradda lagu saaraa arrimaha Amniga, Siyaasadda, Dhaqaalaha iyo qodobo kale oo dhammaantood baahi gaar ah loo qabo.