War cusub oo kasoo kordhay dagaal beeleedka xadka Hiiraan iyo Shabellaha Dhexe

Taliska Ciidanka Booliska Dowlad-goboleedka HirShabeelle ayaa saacadihii lasoo dhaafay ku guuleystay in uu qaboojiyo dagaal beeleedkii ka taagna xuduuda gobollada Hiiraan iyo Shabeellaha Hoose.

Taliyaha Ciidanka Booliska Dowlad-goboledka HirShabeelle G/Sare Xasan Dhicisow Xasan iyo wafdi culus oo labada gobol ah oo muddooyinkii dambe ku sugnaa deegaanada hoosyimaado degmada Jalalaqsi iyo degmada Ceel-baraf ayaa ku guuleystay in hadda la joojiyo colaadii u dhaxeysay deeganada labada deegaan.

Sidoo kale waxaa la kala qaaday ciidamadii isku horfadhiyay dhul beereedkaasi, ayada oo la kala dhex dhigay ciidamo suga amniga deegaanada lagu diriray ee Jalalaqsi iyo Ceel-baraf.

Taliska Booliska iyo masuuliyiinta ka socotay labada gobol oo isugu jiray guddoomiyeyaasha, wasiiro iyo saraakiil sar-sare ayaa sidoo kale ku guuleystay in dib la iskugu furo isku socodkii labada dhinac.

Waxaa loo balansan yahay gogol nabadeed oo dib u heshiisiin, si colaadda deegaanadaasi mudada ka taagneyd si rasmi ah loogu soo afjaro.

Maamulka HirShabeelle ayaa maalmo ka hor ku eedeeyay kooxda Al-Shabaab hurinta dagaal beeleedka kasoo cusboonaaday xadka kala qaybiya gobollada Hiiraan iyo Shabeellaha Dhexe.

Maamulka ayaa sheegay in kooxda isku direyso labada beelood, islamarkaana ay hurineyso dagaalkooda, si ay uga dhex faa’iideysato.

“Ujeedka ay ka leeyihiin hurinta colaadahaasi waa inay isaga yareeyaan culayska hadda saaraan, maadaama lagu jabiyay oo looga adkaaday deegaanada maamulka HirShabeelle.”