Madaxweynaha Turkiga, Recep Tayyip Erdoğan, ayaa xaqiijiyay in dalkiisu uu diiday codsi ka yimid Madaxweynaha Israa’iil, Isaac Herzog, oo doonayay in uu isticmaalo hawada Turkiga si uu uga qeyb galo shirweynaha cimilada ee COP29 oo ka dhacay magaalada Baku ee dalka Azerbaijan.
Erdoğan ayaa sheegay in go’aankan uu yahay mid ka tarjumaya mowqifka adag ee Turkiga ka qaatay weerarada Israa’iil ee Gaza iyo Suuriya.
Diidmada Turkiga ayaa sababtay in safarkii Herzog uu baaqdo, iyadoo xafiiska madaxweynaha Israa’iil uu sheegay in go’aankaasi uu ku saleysnaa “xaalad amni”. Si kastaba ha ahaatee, warbaahinta Turkiga ayaa sheegtay in sababta dhabta ah ee safarka loo joojiyay ay tahay diidmada Turkiga ee isticmaalka hawadeeda.
Erdoğan ayaa sidoo kale sheegay in Turkigu uu u soo jeediyay Herzog in uu isticmaalo wadiiqooyin kale, balse aysan caddeyn inuu awooday inuu safarkiisa sii wato.
Go’aankan ayaa muujinaya sida Turkigu uga soo horjeedo falalka Israa’iil ee ka dhanka ah Falastiin, gaar ahaan weerarada Gaza iyo Suuriya.
Xiriirka u dhexeeya Turkiga iyo Israa’iil ayaa sii xumaanayay tan iyo markii uu billowday dagaalka Gaza bishii Oktoobar 2023. Turkigu wuxuu horey u joojiyay xiriirka ganacsi ee kala dhaxeeyay Israa’iil, wuxuuna dib ugu yeeray safiirkiisii Tel Aviv. Sidoo kale, Turkigu wuxuu ku eedeeyay Israa’iil in ay geysaneyso xasuuq ka dhan ah shacabka Falastiin.
Go’aanka Turkiga ee ah in uu xannibo isticmaalka hawadiisa ayaa ah tallaabo kale oo muujinaysa sida uu Erdoğan ugu adkeysanayo mowqifkiisa ka dhanka ah Israa’iil, xilli xiisadda gobolka ay sii kordheyso.