Cabdullaahi Maxamed Cali Sanbaloolshe, Taliyaha hay’adda Sirdoonka iyo Nabad-sugidda Qaranka ee NISA ayaa laba jeer ku laabtay gobolka Hiiraan, tan iyo markii loo magacaabay hoggaanka cusub ee hay’adda NISA.
Sababta ugu weyn ee safaradiisa ayaa lagu sheegay mid uu ku raadinayo inuu reerkiisa ku qanciyo inay dib u bilaaban gulufkii ka dhanka ahaa argagixisada.
Reer Hiiraan, gaar ahaan beesha uu ka dhashay Taliye Sanbaloolshe ayaa haysta diiwan ammaan mudan marka laga hadlayo sida ay ula dirireen argagixisada, ugana saareen inta badan deegaanadooda.
Tan iyo markii uu dagaalka dhaafay waxaa batay jabka iyo ciidamada kasoo baxaya furimaha. Dowladda madaxweyne Xasan Sheekh waxay fahamsan tahay in howl-galkan cusub aan looga maarmi karin reerkan sida ba’an u jabiyay argagixisada.
Waxay qabaan reerkan tabashooyin siyaasi ah, si gaar ah mid la xiriirta maamulka HirShabelle. Madaxweyne Xasan Sheekh ayaa saddexdii bilood ee ugu dambeysay waxa uu reerkan siiyay laba kursi oo muhiim ah, waana Taliyaha NISA iyo Safiirka Turkiga, waxaana uu hadda uga fadhiya inay dagaalka ku garabsiiyan.
Waxay u muuqata in tabashadooddii federaalka ay hoos u dhacday balse midda ay ka qabaan HirShabelle iyo sida looga qanci karo ayaa ah culeys weyn oo horyaala Taliye Sanbaloolshe.
Madaxweyne Xasan Sheekh ayaa la sheegay inuu sugayo in Sanbaloolshe reerkiisa kusoo qanciyo inay dagaalka dib ugu soo laabtan. Culeysyada kale ee jira ee burintana u baahan waxaa kamid ah; argagixisada oo odayaal iyo dad deegaanka jooga oo reerkaas ah dhowr jeer usoo bandhigay inay nabad ka qaataan.
Sida muuqata reerkan loogama maarmo dagaalka, Sanbaloolshe inuu kusoo qancin waayo wax weyn ayey u dhimi kartaa qorshihiisa cusub ee la-dagaalanka argagixisada iyo jihada cusub ee hay’adda NISA.
Dowladda madaxweyne Xasan Sheekh ayaa dooneysa inay dib ugu laabato la-dagaalanka argagixisada, halkaas oo uu sidoo kale madaxweynaha doonayo inuu kusoo ceshto dhibcihii uga lumay xoog ku meel-marintii dastuurka iyo buuqii siyaasadeed ee taagna waayahan.
Dadka qaar waxay aaminsan yihiin inuu Sanbaloolshe reerkiisa kusoo celin karo dagaalka, balse ay dhici karto inay shuruudo adag miiska keenaan sida; in loo damaanad qaado madaxtinimada maamulka HirShabelle doorashada soo aadan.