Taliyaha Ciidanka Asluubta Soomaaliyeed Janeraal Mahad Cabdiraxmaan Aadan oo maanta la hadlay warbaahinta ayaa shir ay qabatay Wasaaradda Cadaaladda iyo Dastuurka Xukuumadda Soomaaliya kaas oo Muqdisho ka socda saddex maalin ku tilmaamay in uu yahay mid burburinaya hawsha Qaranka.
Shirkaan oo Muqdisho ka furmay todobaadkaan gudihiis gaar ahaan maalinta Axadda ayaa ciwaankiisa ahaa hannaanka Federaaleynta Asluubta Soomaaliyeed, iyada oo u jeedka shirka Wasaaradda ku sheegtay faham qaadashada Farsamada qaab dhismeedka nidaamka hannaanka federaleynta Asluubta Soomaaliyeed iyo sidii loo heli lahaa heshiis ku saabsan hagaajinta iyo hirgalinta lagama maarmaanka u ah hannaanka federaaleynta Soomaaliyeed.
Qabashada shirkaan ayaa waxaa qaadacay Taliyaha Ciidanka Asluubta Soomaaliyeed Janeraal Mahad Cabdiraxmaan Aadan, Taliyaha ayaa sheegay in shirkaan aysan qeyb ka ahayn taliska Ciidanka Asluubta maadaama uu ku saabsan yahay taliska, waa sida uu hadalka u dhigay.
Taliyaha ayaa sheegay in shirkaan ay Asluubta qaban qaabisay balse hal qof aan looga yeerin ka qeyb galka shirkaa, isaga oo arintaas ka hadlaya waxa uu yiri, “Shirka oo looga hadlay Ciidanka Asluubta dhismihiisa iyo xabsiyada dhismahooda, oo ay Asluubtu qaban qaabisay oo hal qof Asluubta aan looga yeerin.”
Taliyaha oo sii hadlaya ayaa hadalkiisa ku sii daray, “Asluubta anniga ayaa Taliye ka ah, aan la’iisheegin, la’igu marti qaadin saan ayaa jirta imow aan la’idhihin, cidkale aan wakiishto ama anniga aantagee, shirkaas waxa aan u aragnaa qalad, burburin howl qaran ayaan u aragnaa.”
Dhanka kale Taliyaha Ciidanka Asluubta Soomaaliyeed Janeraal Mahad Cabdiraxmaan Aadan ayaa sheegay in ciidanka Asluubta ay sharci ku dhisan yihiin, haddii la doonaya in la raro uu mas’uul ka yahay madaxweyne Xasan Sheekh, wixii sharci badallid ah waxa uu xusay in mas’uul ka yahay Baarlamaanka Soomaaliya.
Taliye Mahad Cabdiraxmaan ayaa ugu baaqay mas’uuliyiinta ka shaqeenaya in ay iska horkeen wadaan ciidanka Asluubta iyo Wasaaradda Cadaaladda, “Iska horkeyn Siyaasadeed waaye ee ciidanka iyo Wasaaradda ha’iska horkeenina dadka waxaas wada,” sida uu yiri Taliyaha Ciidanka Asluubta Soomaaliyeed Janeraal Mahad Cabdiraxmaan Aadan.
Eeda uu u jeediyey Taliyaha Wasaaradda Cadaaladda iyo Dastuurka Xukuumadda Federaalka Soomaaliya ayaan la’ogeyn sida ay ugu falcelin doonaan, balse tani ayaa bannaanka keenaysa wada shaqeynta ka dhex dhaxaysa Wasaaradda iyo Taaliska ciidanka Asluubta