Hay’adda qaabilsan amniga gudaha ee Sweden ayaa ku eedaysay Iran inay isticmaashay budhcad ku sugan gudaha Sweden, si ay u bartilmaameedsadaan danaha Israa’iil iyo Yuhuudda.
Daniel Stenling oo ah madaxa qaabilsan ka hortagga sirdoonada dibedda ee hay’adda amniga Sweden ayaa eedaymahan u jeediyey Iran, xilli uu qabtay shir jaraa’id.
Wuxuu sheegay inay arrintani ahayd isku day ay doonayeen inay ku bartilmaameedsadaan danaha Israa’iil iyo kuwa Yuhuudda ee ku yaalla gudaha Sweden.
Sidoo kale wuxuu tilmaamay inuu jiro xiriir u dhaxeeya shabakado budhcad ah iyo shakhsiyaad ka hawl’gala hay’adaha amniga ee Iran.
Wakaaladda wararka ee Reuters ayaa isku dayday inay arrintan wax ka weydiiso wasaaradda arrimaha dibedda ee Iran, hase ahaatee uma suurogelin.
Hay’adda amniga Sweden ayaa sidoo kale ku eedaysay Iran in maamulka waddankaasi uu qaadayo tallaabooyin ka dhan ah dadka kasoo horjeeda oo ay ku jiraan qurbe-joogta Iran, iyaga oo sidoo kalena bartilmaameedsanaya danaha dalalka kale.