Magaalada Muqdisho ee caasimada Soomaaliya waxaa soo gaaray wafdi ka socda safaaradda dalka Hindiya ee Kenya.
Wafdigan ayaa dalka u yimid sahminta qaabka ugu fudud ee muwaadiniinta Soomaaliyeed ee u socdaalaya dalkaas ay Visaha uga qaadan karaan magaalada Muqdisho.
Wafdigan ka socda Hindiya ayaa waxaaa xafiiskiisa ku qaabilay wasiirka arrimaha dibadda Soomaaliya Axmed Macallin Fiqi po ay ka wada-hadleen arrintaan oo muhiim u ah bulshada Soomaaliyeed ee inta badan arrimaha caafimaad u aada dalkaasi.
Shaqadan oo dowladda Soomaaliya ay ku mashquulsanayd lixdii bilood ee u dambaysay ayaa la rajaynaynaa in ay mar dhow miradhal noqon doonto.
Tan ayaa ka dhigan in laga maarmi doono in bulshada Soomaaliyeed ee ku dhaqan dalka, gaar ahaan kuwa xanuunsan ay dalal kale u safraan si ay Visa-ha halkaas uga helaan.
Soomaalida ayaa ku jirta dadka ugu badan dunida ee arrimaha caafimaadka u taga dalka Hindiya, balse safaarad iyo qunsliyad toona kuma lahan Soomaaliya, taasi oo qofka Soomaaliga ah ku kaliftay in wadan kale uu dal ku galka Hindiya kasii qaato.
Dadka Soomaaliyeed ee caafimaadka u aadaya Hindiya ayaa badankood Visa-ha ka dalban jireen Addis Ababa, maadaama Soomaalida ay dalka Itoobiya ku tegi karto fiisa la’aan, halka Kenya qofka Soomaaliga ah laga doonayo inuu fiise ku galo.
