Marka ay noqoto qurbaha si gaar ah dalalka reer galbeedka waa wax inta badan bulshadu ay maqasho qof lagu tilmaamo cunsuri ayaa weerar qaaday oo dad dilay ama waxyeello kale geystay.
Si gaar ah marka aynu dul istaagno waxaa jira weerarro dhowr ah oo lagu qaaday masaajid ay mas’uul ka yihiin culimo Soomaaliyeed kuwaas oo ku kala yaallay dalal kala duwan sida Yurub iyo Mareykanka.
Mareykanka Masjid ku yaalla Minneapolis oo la yirhaado Al-xikma ayaa dhowr mar la wareeray iyada oo weerarka uu geystay hal nin oo nacayb lagu tuhmay.
Ninka ayaa ilaa 2020-kii si isdaba jog ah u weerarayay masjidka hase yeeshee weerarkiisii ugu dambeeyay ayaa ahaa mid uu qof ku dili rabay sida ay laama amnigu sheegeen, iyada oo qofka uu weeraray uu kamid ahaa jamaacada masaajidka.
Ninka oo la xiray ayaa lasoo taagay maxkamad si wejigii ugu horreeyay ee kiiskiisa loo dhageysto.
Maxakamad ku taalla Gobolka Minesota ee dalka Mareykanka ayaa la soo taagay ninkan iyadoo la filayo in ugu dambeyn uu ciqaabta xukunkiisa maro.
Mas’uuliyiinta masaajidka ayaa sheegay in ninkaan oo hadda xiran ay sababta weerarkiisa u maleynayaan in uu salka ku hayo Islaam nacayb iyo in uu doonayo in la burburiyo masaajidka si Meesha laga dhisay oo ahaan jirtay kaniisad dib loogusoo celiyo.
Imaamka masaajidka oo lagu magacaabo Cabdirisaaq Xasan Kaynaan ayaa BBC-da u sheegay halka aydacwaddiisu mareyso.
“Msaajidkan nin ayaa in muddo ahba weerar ku hayay, dhibaatooyin ayuuna ka geystay, qorshihiisana waxan u aragnay in markii ugu dambeysay uu doonayay in uu qof dilo, hadda waxaa gacanta ku haya laamaha amniga hordhacana waa in hadda lasoo taagay maxkamad”, ayuu yiri Sheekh Cabdiraaq Kaynaan.
Maxkamadda ayaa sheegtay in ninkan hadda aan lagusii dhex deyn doonin maadama lagu sheegay in bulshada uu khatar ku yahay.
XIGASHADA SAWIRKA,IMAAM CABDIRISAAQ KAYNAAN
“Dembi oogaha ayaa codsaday in 250,000$ oo damaanad ah lagusii daayo iyo in uusan aagga masaajidka usoo dhawaan Karin lugtana looga xiro saacad sheegeysa dhaq-dhaqaaqiisa in lala socdo, laakiin xaakimkii ayaa dallacay damiinkiisa, waxana uu ka dhigay 300,000 oo aan damaanad lahayn iyo 250,000 damaanad leh, haddii uu iska bixiyana wuu soo bixi doonaa”, ayuu yiri Sheekh Kaynaan.
Waxaa cad in ninkaan uu bulshada ku yahay khatar sida ay rumeysanyihiin dacwad oogaha iyo xaakimkaba sida uu sheegay Imaanmka masaajidka.
Jamaacada masaajidka ayaa la sheegay in ay cabsi lasoo deristay, iyaga oo intooda badan ay weli soo xaadiraan xilliyada salaahada ee masaajidka.
“Waxaa xaqiiqo ah in jamaacadi ay naftooda u baqeen, wuu jiraa is bedel laakiin dadku waa muslimiinta imaan leh, weli waa ay yimaadaan intooda badan waxana rajeyneynaa in ay sii wadaan” ayuu yiri imaamka.
Meesha masaajidku uu ka dhisanyahay ayaa horraan ahayd kaniisad hase yeeshee goor dambe ayaa la burburiyay oo laga dhigay masaajid waana sababta uu imaamku masaajidku ugu badinayo in ninka weerarka geystay uu kamid ahaa dadkii ku xirnaa kaniisadda welina uu doonayo in loosoo celiyo.
XIGASHADA SAWIRKA,IMAAM CABDIRISAAQ KAYNAAN
“Sababta rasmiga ah ee ninkan uu weerarka usoo qaado ma hubno laakiin meesh uu masaajidku ka dhisanyahay waxa ay horay u ahayd kaniisad, waxaa laga yaabaa in uu kamid yahay dadkii ku xirnaa kaniisadda isla markaana doonaya in kaniisaddii lasoo celiyo ayuu yiri Sheekh Cabdirisaaq Xasan Keynaan oo ah imaamka masaajidka Al-xikma.
Ma ahan markii ugu horreysay ee werarro canynkan ah ay ka dhacaan goobaha lagu cibaadeysto hase yeeshee kan ayaa uga duwan weerarradii hore in uu yahay mid ku kooban hal shaqsi isla markaana dhacay marar kala duwan.
Maxkamadda ayaa haatan laga sugayaa xukunka ugu dambeeya ee ninkan iyadoo weli maxkamadeyntiisu ay socoto.