Xabsi ku yaalla dalka Brazil ayaa – beddelkii eeyaha – wuxuu adeegsanaya haadda nuuca aad duuli karin ee digaagta la bahda ah. Laakiin halkii sida eeyaha ka eryan jireen ama ka qeylo dhaamin lahaayeen, waxay shimbirahani yeerinayaan ci’dii ama dhawaqii lagu yiqiin digaagadaha.
Marwalba oo qof isku dayo inuu xabsiga ka baxsado, la-yaab malahan inay qeyliyaan. In kasta oo casriga maanta ay aad u adag tahay in xabsi laga baxsado maadaama tiknoolojiyadda casriga ah ay wax walba ka dhigtay fudeyd, haddana waxaa lama huraan in aadanuhu yeesho beddel uu ku kabi karo ama uu xattaa mararka qaar kaga maarmi karo teknoolojiyadda.
Bani aadanka iyo eeyaha in loo adeegsado ilaalo ahaanna waa arrin soo jireen ah. Balse hadda waxay xabsiyada qaar tijaabo gelinayaan suuragalnimada in digaagga qaarkiis ilaalo looga dhigan karo xabsiyada. Sababaha ay ku doorteen waa dhowr: waxaase ugu mudan qiimo jabnaantooda. Halkii eyga laga yaabo inuu ku kaco lacag badan soo iibsigiisa, digaaggani waa raqiis. Waxaa kale oo lagu soo warramayaa inay sidoo kale aad u digtooni iyo caaboonaan badan yihiin.
Nuuca digaaggan hadda ilaalo looga dhigay xabsiyo qaar oo ku yaalla Brazil waxaa lagu sheegay dhego-fudeyd xagga maqalka ah. Waxaa la tilmaamay inay aad u wax maqli og yihiin. Sidoo kalana awoodi karaan inay u falceliyaan si dhaqso leh. Waxaana dhawaaqooda durba ku baraarugaya ilaalada caadiga ah kuwaas oo falcelin halhaleel ah ka bixinaya dhiillada soo korortay oo ay ka digeen digaaggu!