Ugaas Yuusuf Ugaas Xasan Ugaas Khaliif Ugaas Rooble oo noqonaya Ugaaskii 21-aad ee beesha Xawaadle ayaa maanta lagu caano-shubay deegaanka Daharro Ugaas oo ka tirsan magaalada Halgan ee gobolka Hiiraan.
Ugaas Yuusuf ayaa badalaya aabbihii Ugaas Xasan Ugaas Khaliif oo Muqdisho ku geeriyeeday bishii Febraayo 2021.
Haddaba maxa ay tahay sheekada ay la gaarka tahay deegaanka Daharo Ugaas?
XIGASHADA SAWIRKA,SOCIAL
Deegaanka Daharro Ugaas, ayaa u dhexeeya magaalooyinka Beledweyne iyo Buule-berde.
Deegaankan ayaa taariikh ahaan ku caan baxay in lagu aaso ugaasyadii beeshaasu ay lahayd marka ay dhintaan sababtaa darted ayayna taariikh gaara ugu leedahay.
Dhanka kale, deegaankan ayaa ku yaal xuddunta deegaammada beeshaas.
Beeshan ayaana soo yeelatay 21 dhaqan, taas oo sida ay noo sheegeen duqeytida deegaankaasi, laba keliya mooyee in inta kale isla hal deegaan lagu caleemo saaray.
Waana arrin dhaqan ah, labada jeerna ugaaskii koowaaad mooyee marka labaad duruufo ayaa keenay in aan halkaa lagu caleemo saarin.
“Waa dhaqan la ilaaliyo oo beeshuna way ilaalisaa, ugaasyadu way ilaaliyaan in halkaas lagu duugo oo lagu caleemo saaro, weliba qodobka duugitaanka waa qodob soo jireen oo aan laga leexin karin haddii aan duruuf gaar ahi aysan keenin’ ayuu BBC-da u sheegay Cilmi Faarax Nuur Webi, oo xilal hore uga soo qabtay dawladihii hore ee Soomaaliya, kana mid ah duqeytida beeshaas.
Dhaqamada gaarka ah ee beeshan iyo ugaaskoodu la gaar yahay
XIGASHADA SAWIRKA,HIIRAANWEYN
Beesha Xawaadle, ayaa ka mid ah beelaha Soomaalida kuwooda ugu adag dhanka dhaqanka.
Waxaana ay marsiiyaan shuruudo gaar ah oo la xidhiidha xulashada ugaaska.
Shuruudahan ayaa ka mid tahay in qofka ugaaska noqonaya uu ugaas dhalay ama uu la dhashay, sida oo kale waa in uu yahay qof ay soo jeediyaan jufada reer Ugaas ee beeshaas ka tirsan. Sida oo kalena waa in uu yahay nin diintiisa Islaamka iyo dhaqankiisaba la hubiyey.
Qodobka ugu muhiimsan ayaana ah kolka la xulo, in ugaaskaas diyadiisa ama magtiisa la bixiyo, taas oo lagu qeexay in ay muujinayso in qofkaasi soo dhaafay ehelkiisa iyo jufadiisii ee uu yahay qof beeshaas oo dhan ka dhexeeya.
“Ujeedka ayaa ah in wixii maalinkaa ka danbeeya ninkaasu aanu noqon qof ka tirsan jufada reer Ugaas ee uu noqdo nin Xawaadle leeyahay,” ayuu BBC-da uu sheegay.
XIGASHADA SAWIRKA,SOCIAL
Ugaaska hore ee beeshan Allaha u naxariistee Ugaas Xasan Ugaas Khaliif ayaa geeriyooday horraantii sannadkii 2021.
Waxaana muddadaas maamulka reerkaas sii hayey ugaas ay leeyihiin reer kale.
Markii la eego dhaqanka Soomaalidana marka uu ugaas geeriyoodo caadiyan kusime reerka u diyaarsanaa ayaa isla markiiba si kumeel gaar ah xilka u sii qabta, hasayeeshe beesha Xawaadle oo uu Ugaas Xasan ka baxay waa ay ka duwan tahay oo waxaa ugaasnimada ku sii simaya ugaaska beesha Cayr oo sii ahaa ugaaska Xawaadle ilaa iyo inta laga caleemo saarayey ugaaska cusub.
Qaar ka mid ah madaxda sare ee ka tirsan Dawladda Federaalka ayaa ka qayb galay caano-shubka Ugaaska, waxana magaalada Halgan maalmihii ugu dameeyay ku qulqulayay boqollaal qof oo ka kala yimid dalka gudihiisa iyo dibaddiisa.
Taliyaha NISA Cabdillaahi Maxamed Cali Sanbalooshe iyo xubno ka tirsan Dawladda Federaalka ayaa shalay u tagay gobolka Hiiraan ka qaybgalka caano-shubka Ugaaska.
Saldanadda beeshan ayaa kamid ah kuwa ugu faca weyn dhulka Soomaalida, waxana si weyn reerka dhexdiisa looga ixtiraamaa Ugaaska markaas xukunka haya.
BBC SOMAli