Imaaraatka Carabta ayaa Masar siin doona $35 bilyan si ay u iibsadaan magaalada Ras el-Hekma ee ku taal xeebta waqooyi Masar,sida uu maanta ku dhawaaqay ra’iisul wasaaraha Masar Mostafa Madbouly ka dib toddobaadyo la isla dhexmarayay, wuxuuna saxiixay heshiiska ay Imaaraadka ku yeelanayaan magaaladan. Marxaladda dhaqaale ee Masar, waxay qaadayaan waddo kasta si ay uga badbaado xaaladda burburka dhaqaale.
Madbouly ayaa shir jaraa’id oo uu qabtay, oo ay ka soo qayb galeen mas’uuliyiin ka tirsan Masar iyo Imaaraatka ku sheegay in Masar ay heli doonto lacag horudhac ah oo dhan $15bn toddobaadka soo socda, iyo $20bn oo kale oo ay heli doonto laba bilood gudahood.
Heshiiskan ayaa ah kii ugu balaarnaa ee si toos ah loogu maalgeliyo mashruuca horumarinta magaalooyinka dalka, sida uu sheegay ra’iisul wasaaruhu. Waa iskaashi ka dhexeeya dawladda Masar iyo dawladda Imaaraatka.
Warka ku saabsan iibka ayaa waxa dhaleeceeyay Mucaaradka Masar kuwaasoo sheegay in dhulku yahay mid ka mid ah meelaha ugu qiimaha badan ee xeebta Masar, loona baahan yahay in ay horumariyaan maalgashadayaasha maxalliga ah.
Laakiin Madbouly waxa uu sheegay in dawladda Masar ay boqolkiiba 35 ka heli doonto faa’iidada mashruucan, inkasta oo ay tahay maalgashi gaar ah oo inta badan saamiga ay leedahay dawladda Imaaraadka Carabta.
Waxa uu sheegay in aagga mashruuca Ras el-Hekma uu yahay 170 milyan oo mitir oo laba jibbaaran, waxaana ku jiri doona xaafado la deggan yahay, goobo dalxiis, dugsiyo, jaamacado, aag warshadeed, xarun dhexe oo maaliyadeed iyo ganacsi, marin caalami ah oo loogu talagalay doonyaha dalxiiska. , iyo garoon caalami ah oo koonfurta magaalada ka xiga.
Madbouly waxa uu sheegay in heshiiska uu ku jiro 11 bilyan oo dollar oo Imaaraadku hore ugu shubay bangiga dhexe, lacagtaas oo loo beddeli doono deeq.
Isagoo ka hadlayay masiirka dadka degan deegaanka Ras el-Hekma, Madbouly wuxuu sheegay in loo rari doono deegaano kale, lana siin doono magdhow lacageed. Waxa uu intaasi ku daray in mashruucani uu dalka ka saari doono dhaqaale xumada haysata.