Madaxweynaha Dowlad-Goboleedka Puntland Siciid Cabdullaahi Deni ayaa saaka safar qarsoodi ah ugu ambabxay waddanka Isutagga Imaaraatka Carabta oo muddooyinkii dambe taageero xooggan siinayay maamulkiisa.
Madaxtooyada Putland oo inta badan soo bandhigi jirtay xiliyada uu safarka aadayo ayaa qarisay safarkaan, waxaa la sheegay in uu la kulmayo madaxda Dalka Isutagga Imaaraatka Carabta inkasta oo aan la ogayn waxa ay kawada hadlayaan.
Wararka ayaa intaas ku daraya in uu kasii horreeyay Madaxweynaha Dowlad-Goboleedka Jubbaland Axmed Maxamed Islaam (Axmed Madoobe) oo si qarsoodi ah casumaad uga helay Dalkaan Carbeed ee Imaaraatka.
Siciid Deni iyo Axmed Madoobe oo ah xulufo siyaasadeed oo kasoo horjeeda Dowladda Federaalka, xiriiro telefoon ayaa horay u dhexmaray iyaga oo kawada hadlay xaaladda Dalka, cadaadiska ay saari karaan Dowladda Dhexe iyo qodobo kale.
Warar soo baxaya ayaa sheegaya in Dowladda Isutagga Imaaraatka Carabta ay doonayso in wadahadal ay yeesheen Dowladda Federaalka iyo Dowlad-Goboleedyadaan si loosoo afjaro khilaafka siyaasadeed ee ka dhaxeeyay muddooyinkii dambe.
Imaaraatka wafdi ka socda ayaa dhowaan yimid Magaalada Muqdisho waxaana uu la kulmay Madaxda Dowladda Federaalka, waxa ay wararku sheegayaan in ay kala hadleen wadahadalkaan loogu kala dab qaadayo Dowladda Federaalka, Jubbaland & Puntland.