Horyaalka waddanka Ingiriiska ee Premier League ayaa toddobaadkan ay ballansan yihiin kooxo waaweyn iyadoo sanka ay isku soo hayaan kulamo cidhiidhi ah oo kooxaha u diidaya inay nafis iyo firaaqo helaan.
Ciyaarta ugu weyn ee toddobaadkan la sugayo waa kulanka adag ee Arsenal iyo Liverpool ee maalinta Axadda ee garoonka Emirates Stadium, halkaas oo labada kooxood ay mid walba hagalan u mari doonto sidii ay guul uga keeni lahayd.
Liverpool oo shan dhibcood hoggaanka ku haysa shan dhibcood oo nadiif ah, ayaa haddii ay ka adkaato Arsenal waxay tegi doontaa siddeed dhibcood oo ay ka sarraynayso Gunners, waana arrin aanay qaadan karaynin Mikel Arteta iyo xiddigihiisu oo ay u arkaan inay tahay horyaalka oo ay iska dhiibeen.
Manchester City ayaa iyadana waxay is-haleeli doonaan Brentford oo ay maalinta Axadda kala calaf-qaadi doonaan, halka Everton iyo Tottenham ay iyaguna wada dheeli doonaan.
Manchester United ayaa martigelin doonta West Ham United maalinta Axadda, waxaana natiijooyinka kulamadani ay imanayaan iyadoo min shan ciyaarood ay kooxuhu dheeli doonaan bishan February.
Khabiirka ciyaaraha ee Dimitar Berbatov oo saadaaliyey kulamadan, ayaa waxa uu guul uga dhaartay kooxdiisii hore ee Tottemham, balse waxa uu libin iyo farxad ugu bushaareeyey Manchester United oo sii wadan doonta guulaha xidhiidhka ah.
Brighton ayaa kusoo laaban doonta jidka guusha ee ay ka luntay usbuucan, waxaana ay karbaashi doointaa Crystal Palace, halka Newcastle ay meel saari doonto Luton Tow.
Chelsea oo xasuuq kala soo kulantay Liverpool Arbacadii, waxay kusoo laaban doontaa dariiqa guusha iyagoo saddex dhibcood ka xoogi doona Wolves oo ay u noqon doonto guul-darradii labaad ee xidhiidh ah.
Ciyaarta sida weyn loo sugayo ee Arsenal iyo Liverpool ayaa Dimitar Berbatov waxa uu natiijadeeda ku saadaaliyey mid labada kooxoodba aan farxad gelinayn oo ah barbarro ay dhibcaha ku wadaagi doonaan 2-2, halka Man City uu u sheegay inay xasuuqi doonto Bretnford.
Halkan kaga bogo saadaasha Dimitar Berbatov ee kulamada usbuucan
Everton 1-1 Tottenham
Brighton 2-1 Crystal Palace
Newcastle 2-0 Luton
Burnley 1-1 Fulham
Sheffield United 1-1 Aston Villa
Man United 3-1 West Ham
Chelsea 1-0 Wolves
Bournemouth 1-1 Nottingham Forest
Arsenal 2-2 Liverpool
Brentford 0-2 Man City