RW Xamsa Cabdi Barre oo Xil baddel & magaciis ku sameeyay Wasiiro katirsan Xukuumaddiisa

Ra’iisul Wasaaraha Xukuumadda Federaalka Soomaaliya Xamsa Cabdi Barre ayaa magacaabis iyo xil baddel ku sameeyay qaar kamid ah Wasiirradiisa waxaana uu buuxiyay boosas ay banneeyeen wasiiro katirsanaa Xukuumaddiisa.

Xamsa ayaa boosaska uu buuxiyay waxaa kamid ah Wasaaradda Arrimaha Dibadda & Iskaashiga Caalamiga ah waxaana loo magacaabay Wasiirkii hore ee Arrimaha Gudaha, Federaalka & Dib u heshiisiinta XFS Axmed Macallin Fiqi.

Wasaaradda Arrimaha Gudaha ee Fiqi laga soo wareejiyay waxa uu Ra’iisul Wasaare Xamsa Cabdi Barre u magacaabay Cali Yuusuf (Cali Xoosh) halka Wasiirka Amniga oo booskaas banneeyay Danjiraha Soomaaliya Qatar loo magacaabay Senator Cabdullaahi Sheekh Ismaaciil Fartaag.

Wasiiradda kale ee magacaabistaan kusoo baxay waxaa kamid ah: Cabdullaahi Bidhaan Warsame, Wasiirka Tamarta iyo Biyaha halka Axmed Cumar Maxamed loo magacaabay Wasiiru-Dowlaha Bii’ada iyo Isbadalka Cimilada.

Magacaabistaan, dhammaystirka Wasaaradaha bannaan & xil baddelka uu sameeyay Ra’iisul Wasaaraha Xukuumadda Federaalka Soomaaliya Xamsa Cabdi Barre ayaa meesha ka saartay Wasaaradaha qaar oo bannaanaa.