Ruushka iyo Ukraine ayaa Jimcihii si wadajir ah u shaaciyey in mid kasta uu sii daayey 390 maxbuus dagaal, iyagoo sidoo kale ballan qaaday inay sii wadaan isweydaarsi ballaaran oo maxaabiis ah maalmaha soo socda.
Isweydaarsigan ayaa la filayaa inuu noqdo kii ugu weynaa ee illaa hadda dhaca, tan iyo intii uu socday dagaalka u dhexeeya labada dal.
Tallaabadan ayaa timid kadib kulan labo saacadood socday oo lagu qabtay magaalada Istanbul ee dalka Turkiga, kaas oo ahaa wadahadalkii tooska ahaa ee ugu horreeyey ee dhex mara Ruushka iyo Ukraine tan iyo intii uu dagaalku billowday in ka badan saddex sano ka hor.
Inta lagu guda jiro kulanka, labada dhinac ayaa isku raacay inay is dhaafsadaan illaa 1,000 maxbuus mid kasta, taas oo noqotay tallaabada kaliya ee ay qaadeen labada dal.