Ra’iisul Wasaaraha Xukuumadda Jamhuuriyadda Federaalka Soomaaliya, Xamsa Cabdi Barre ayaa wareegto uu soo saaray ku magacaabay Wasiirro cusub, isaga oo xilka ka qaaday Wasiiro ka tirsan Xukuumaddiisa.
Afhayeenka Xukuumadda Farxaan Jimcaale oo warbaahinta la wadaagay wareegtada uu soo saaray Ra’iisul Wasaare Xamsa ku sheegay in Wasiirka Beeraha iyo Waraabka Xukuumadda Soomaaliya loo magacaabay Maxamed Cabdi Xayir (Maareeye).
Xilka loo magacaabay Wasiir Maareeye ayaa horay waxaa u ahayey Axmed Madoobe Nuunow oo ka mid ah Xildhibaannada Golaha Shacabka Baarlamaanka Federaalka Soomaaliya, kaas oo deegaan doorashadiisu ay tahay dowlad gobaleedka Koonfur Galbeed.
Sidoo kale Ra’iisul Wasaare Xamsa ayaa Wasiirka Hawlaha guud iyo guryeynta Xukuumadda Federaalka Soomaaliya u magacaabay Cabdisalaan Cabdi Cali (Dhaay), iyada oo xilkaan horay u hayey Xildhibaan Ismaaciil Cabdiraxmaan Sheekh Bashiir.
Afhayeenka Xukuumadda Federaalka Soomaaliya Farxaan Jimcaale ma uusan sheegin sababta rasmiga ah ee xilka looga qaaday, balse waxaa jira Wasiirro baanan oo aan weli uusan magacaabi Ra’iisul Wasaare Xamsa.
