Ra’iisul-wasaaraha JFS, Mudane Xamse Cabdi Barre ayaa dhagax-dhigay xarunta dhexe ee Wasaaradda Kalluumeysiga iyo Dhaqaalaha Buluugga ah.
Wasiirka Wasaaradda, Mudane Axmed Xasan Aadan, oo Ra’iisul Wasaaraha ku soo dhoweeyay munaasabadda dhagax-dhigga, ayaa ka warbixiyay shaqadii laga soo maray ee lagu dhisayo xarunta cusub ee wasaaradda, taasoo ay ku howlgali doonto. Wasiirka ayaa sidoo kale, Ra’iisul Wasaaraha u bandhigay qalabyo muhiim ah oo wasaaradda keentay, kuwaas oo isugu jira gawaari, mootooyin qaboojiyaal ah, iyo agab kale oo lagu hormarinayo kalluumeysatada dalka.
Ra’iisul Wasaaraha Xamse Cabdi Barre ayaa tilmaamay in mustaqbalka Soomaaliya horumarsan uu ka iman doono dhanka badda, isla markaana Wasaaradda Kalluumaysiga iyo Dhaqaalaha Buluugga ah ay door muhiim ah ka qaadan doonto kobaca dhaqaalaha dalka.
“Dhaqaalaha Buluugga ah waa mid muhiim ah oo la doonayo in Soomaalidu ka faa’iideysato, waanna halka ay ka bilaabmi doonto Soomaaliya barwaaqo ah oo la soo baxda wax-soo saarka badda iyo khayraadka dihan ee dhulkeeda,” ayuu yiri Ra’iisul Wasaare Xamse Cabdi Barre.
Gabagabadii, RW Xamse, ayaa xusay in laga doonayo dadka Soomaaliyeed inay degaan dhulka xeebaha ah, dowladduna ay ka hirgalin doonto waddooyin waaweyn oo sahlaya isticmaalka khayraadka badda iyo ka faa’ideysiga dhaqaalaha buluugga ah ee dalkeenna.