Nin lagu magacaabo Hashim Dagane Maxamed oo ah eedeysanaha ugu weyn ee lagu tuhunsan yahay dilka saddex haween ah oo dhawaan ka dhacay xaafadda Islii ee magaalada Nairobi ayaa gacanta lagu dhigay.
Bishii Oktoobar ee la soo dhaafay ayaa saddexda haween ah oo hal qoys ka soo wada jeeda lagu dilay Nairobi.
Hay’adda dambi-baarista Kenya DCI ayaa soo qabatay eedeysanaha kaddib baaritaanno ay sameeyeen isagoo ku dhuumanayay goob ku taal Kamukunji Nairobi.
Eedeysanaha waxaa hadda su’aalo lagu weydiinaya xarunta DCI, waxaana la filayaa in maxkamadda la soo taago maanta oo Isniin ah.
Eliud Lang’at oo ah ku xigeenka hoggaanka booliska Kenya oo warbixinta soo saaray ayaa sheegay in howshan ay aheyd in degdeg loo soo farageliyo ka hor inta aysan noqon mid aan suuragal aheyn wax ka qabadkeeda.
“Isbeddelkan murugada leh wuxuu muujinaya baahida degdegga ah ee loo qabo ficilada diiradda lagu saarayo iyo iskaashiga si wax looga qabto dhibaatada baahsan ee xadgudubka ku saleysan jinsiga ee ka dhexjira bulshadeena”
Saddaxda haween ee la dilay ayaa ahaa hal qoys. Dahabo Daa’uud Siciid, Aamina Cabdirashiid iyo Muuseiba Cabdi Maxamuud oo 12 jir aheyd. Mid ka mid ah haweenka oo aheyd hooyada qoyska ayaa maydkeeda laga helay magaalada Machakos oo caasimadda Nairobi u jirta 61 kilo mitir, sida ay sheegeen qoyskeeda.
Maamada la dilay ayaa la sheegay in ay aadday isbitaal. Gurigeeda ayaa waxay ka baxday labo saac oo habeennimo kaddib dib dambe uma aysan soo hadlin, meel ay jirto ayaa la wayay ayey sheegeen qoyskeeda.
Maxay qoysku ka dheheen soo xiridda eedeysanaha?
Booliiska ayaa intii ay wadeen baarista la xiriiray qoyska una sheegay halka ay wax marayaan iyo in maanta oo Isniin ah maxkamdda la keenayo.
“Markii gacanta lagu dhigay waa nalala soo xiriiray, qeybta dambi-baarista ayaa la geeyay, wey noo diideen in aan aragno, iyaga ayaa maxkamadda ballamiyay, saakay ayaa maxkamada geeyay”
Qoyska dhibanayaasha waxay noo sheegeen in uu horjoogo cadaaladda ninka ay ku tuhmayaan dilka qoyskooda, ayna rajeynayaa in ay helaan cadaalad.
Cabdi Maxamed oo loo yaqaan Bashiir waa aabbaha qoyska waxa uu BBC-da u sheegay in ay doonayaan caddaalad.
“Aad ayaan u faraxay, Alle ayaa mahad leh, awal hore waxaan raadineynay sidii lagu heli lahaa taas ayaa murugo nagu haysay, hadii la soo helay, aad baan ugu faraxnay, iyad ayaan ugu dambeyneynaa wixii dhiman”
Sidoo kale Cabdi Maxamed wuxuu noo sheegay in saakay ay tageen maxkamadda, ayna goobooj u ahaayeen sida wax u bilowdeen. Wuxuu kaloo sheegay in ay rajeynayaan in ay helaan cadaalad
“Caddaalad ayaa rajeynayaa, curadeydi ayuu dilay, xaaskeygi ayuu dilay iyo gabadhii aan adeerka u ahaa”
Xariga eedeysanaha ayaa yimid kaddib markii waaxda dambi-baaristsa ay soo saareen codsi ay dadweynaha kaga dalbanayaan in lala wadaago xogta halka uu joogo ninka la tuhunsan yahay.
Muuqaallo ay duubtay caamerada ayaa lagu arkay gaariga Maxamed oo ka qaadaya gabdhaha xaafadda Islii waxyar ka hor inta aan meydkooda laga helin meelo kala duwan.
Gaariga lagu qaaday haweenka ayaa markii dambe laga helay isagoo yaalla meel cidlo ah oo ku taalla suuqa Wakulima oo u dhow masraxa macallinka ENA. Gaariga ayaa loo jiiday Xarunta DCI-da halkaas oo baaris dheeri lagu sameeyay.
Kooxaha xuquuqda aadanaha ayaa ka dalbaday madaxweynaha Kenya William Ruto in dilka haweenka yahay musiibo qaran, uuna dedejiyo go’aan ka gaarista dhammaan kiisaska la xiriira geerida iyo weerarka loo geysto haweenka.
Madaxweyne William Ruto iyo madaxa cadaaladda Martha Koome ayaa ku baaqay in tallaabooyin degdega ah ay qaadaan ciidamada ammaanka.
Madaxa booliskam, Douglas Kanja Kirocho, ayaa u xaqiijiyay dadweynaha in booliska ka go’an tahay ilaalinta amniga iyo cadaaladda dhammaan shacabka.