Qaar ka mid ah madaxdii hore ee dalka oo soo saaray warsaxaafadeed ka dhan ah damaca Itoobiya

Qaar ka mid ah Madaxdii hore oo uu ku jira Madaxweynihii hore ee Soomaaliya iyo Ra’iisul Wasaarayaal hore ayaa taageero u muujiyey dowladda Soomaaliya, ka dib xadgudubkii dowladda Itoobiya ay ku sameysay Soomaaliya, iyada oo damac kaga jira Badda Cas.

Warsaxaafadeedka ka soo baxay madaxdii hore ee dalka ayaa lagu yiri, “taageerada aan kala go’a lahayn iyo garab istaagga dadaalka ay dowladda federaalka Soomaaliya ugu jirto ilaalinta madaxbanaanida, madaxbanaanida, iyo wadajirka dhuleed ee qaranka.”

Mawqifkan wadajirka ah ayaa soo ifbaxaya iyada oo ay sii kordhayso xiisadda kala dhaxaysa Itoobiya, taas oo muujinaysa go’aan adag oo ku aaddan danaha qaranka, waxaana xusid mudan in Golaha Wasiirrada iyo Xildhibaannada labada Aqal ay soo wada saareen qaraar ay kaga soo horjeedaan dmaaca liita ee Itoobiya.

Siyaasiyiintaan ayaa waxaa ka mid ah Madaxweynihii hore ee Soomaaliya Shariif Sheekh Axmed, Guddoomiyihii hore ee BFS Shariif Xasan Sheekh Aadan, Ra’iisul Wasaarayaashii hore ee Soomaaliya Xasan Cali Kheyre iyo Cabdiwali Gaas, sidoo kale waxaa ka mid Cabdiraxmaan Cabdishakuur iyo Cabdulqaadir Cosoble oo kawada tirsan Golaha Shacabka.

Warsaxaafadeedka ka soo baxay siyaasiyiintaan ayey ku sheegeen muhiimadda ay leedahay ilaalinta mabaadi’da asaasiga ah ee Soomaaliya iyo ka hortagga wax kasta oo khatar ku ah madax-bannaanideeda.