Maamulka Puntland ayaa shaaca ka qaaday inaysan u hoggaansan doonin nidaamka cusub ee dal ku galka Soomaaliya ee dowladda Federaalka ay ka dhigtay hab online ah (E-Visa). Wasiirka Warfaafinta Puntland Maxamuud Caydiid ayaa ku tilmaamay tallaabada dowladda federaalka “isbaaro hawada la dhigtay” isaga oo sheegay in lacag dal ku gal ah laga doonayo qof kasta oo ka soo dega garoomada Puntland.
Dowladda Federaalka ayaa hore u shaacisay in qof kasta oo wata baasaboor shisheeye oo dalka imanaya looga baahan yahay in uu dal-ku-galka ku goosto online taas oo lagu sheegay hab casri ah oo lagu mideynayo nidaamka socdaalka. Hase yeeshee go’aankan ayaa durba dhibaato ku noqday dadka ka yimaada Puntland iyo Somaliland kuwaas oo laga rabo inay bixiyaan dal ku gal kale marka ay degaan.
Arrintan ayaa ka dhigan in qof wata baasaboor shisheeye oo ku socda Puntland ama Somaliland uu bixiyo labo lacagood oo dal ku gal ah mid ka online-ka ah iyo midka gudaha looga baahan yahay. Tallaabadaas ayaa dhalinaysa culayska dhaqaale ee lagu saarayo dadka Soomaaliyeed ee qurbaha ku nool.
Maamulka Puntland ayaa sheegay in go’aanka dowladda Federaalka uu caqabad ku noqonayo shacabka Soomaaliyeed ee wata dhalashada dalalka shisheeye, gaar ahaan dadka qurbaha ka soo laabanaya. Wasiirka Warfaafinta ayaa sheegay in Puntland ku adkaysatay in aysan fulin doonin nidaamka E-Visa isla markaana ay sii wadi doonaan qaadista dal ku galka gudaha.